【天使之路】為爭做Victoria's Secret模特兒 參賽者醜態盡出

撰文:鄺鈺瑩
出版:更新:
節目就算找來陳冠希女友秦舒培做教官又有咩用?質素有得教的嗎?

國內最近有個真人騷名叫《天使之路》,簡單啲講就係愛奇藝同知名內衣品牌Victoria's Secret合作,透過節目選拔超模,再安排這位幸運兒直通VS舞台,雖然參賽人數眾多,但由於名額只得1個,所以節目才播出第3集,但已經出現欺凌、黑面、發脾氣、爆粗、退選等情況,完全係模特兒界《甄嬛傳》。

陸瑤既是歌手又是模特兒,對於自己的身材從來都不會吝惜。(影片截圖)

入選《天使之路》的模特兒最先有30位,到現在只係得返一半,年紀最細係19歲,最大係30。節目中,最先聲奪人的陸瑤,簡單一句「前男友太紅了,我們在一起的時候,他還不是唱《模特》的那個人。」已經令人即時諗起她同李榮浩的戀情,而剛好地,李榮浩於台北演唱會上公開同現任女友楊承琳的關係,真係夾都無咁準。

吳月因為好友出局,而喺宿舍發脾氣丟東西,之後又玩針對,網民對佢一致負評。

如果無緋聞炒作又可以點呢?唯有靠把口,90後吳月乃學生模特兒,知名度一般,但自從加入節目後,不時成為熱搜人物,就好似其好友王藝被淘汰時,吳月毫不客氣的連環炮擊另一名模特兒陸祺樺:「為什麼該滾的還不滾?從見到你第一面起,我就想讓你滾。」接連被孤立、單打,陸祺樺決定要退出節目,結果又被吳月指不尊重比賽,真係做乜都錯。

袁博超因為工作人員唔扶佢而拒絕做訪問,咩玩法?

同樣係90後嘅袁博超,由於參加過不少外國品牌騷,加上曾登上意大利Vogue雜誌封面,所以由她參加節目時,已經呼聲甚高,不過第3集當她在電單車前跳起時,由於地滑跌倒,返到後台準備做訪問時,袁博超一開口就話:「有一種心情叫不想說話,我現在不想採訪。」之後更怪責工作人員為節目效果而見死不救。其實,模特兒喺T台跌倒時有發生,最緊要識執生,更何況,節目為求達到效果,經常奇招盡出。女人多,是非多,唔少觀眾都話《天》一班模特兒未到T台就已經無晒質素可言。

潘嘉純因為得分低而當場爆粗,之後更對給予安慰嘅參賽者翻白眼。
最新一集安排眾模特兒以京劇造型拍攝硬照,但網友話唔識欣賞,仲問模特兒係未得罪咗化妝師。
+9