早前楊冪擔正的內地劇《三生三世十里桃花》，口碑收視雙雙報捷，雖然劇已播完，但話題依舊未停過。劇中楊冪嘅替身卓亨瑜，因為同本尊相似度實在太高而被受關注，不過就唔係讚佢靚或者有氣質，而係有唔少網友發現佢同楊冪嘅衣著打扮，影相pose都愈來愈似，留言暗諷卓亨瑜「簡直用生命在模仿」，議論紛紛甚至更登上話題熱搜榜。

卓亨瑜本身係內地模特兒，去年初網上流出佢嘅古裝相片，由於同楊冪實在太似樣，2月嗰陣《三生三世》劇組特別喺官方微博回應過「有人說大冪冪的替身很像玄女，這個妹妹是在大冪冪A組轉B組，拍戲時間緊張時，當了一天的背替，替了一個鏡頭」能夠擔任替身，當然係劇組都認同佢同楊冪好相似啦，至少個背脊一定似。

不過呢一年以來，網友發覺卓亨瑜衣著打扮疑似照抄楊冪，好似日前一張，身穿一件黑色長版T腳踩白波鞋，反戴棒球帽，SHOW出修長美腿，眼利嘅網友發現呢身打扮同楊冪之前現身機場，幾乎一模一樣。照片一PO，不少網友留言調侃「簡直用生命在模仿」、「做自己不好嗎」，砲轟聲不斷。卓亨瑜亦非省油的燈，直接開火話自己著嘅衫同鞋，只要係有關注潮流嘅女仔都會知道：「是不是以後購物前，我還得做功課XX穿過什麼衣服褲子鞋子、吃著什麼飯、幾點睡的覺、走的什麼路」，並回應網友「YOU HAPPY JIU OK（你開心就好），但別扯上我，長點腦」。

其實卓亨瑜一直活躍於社交平台，大量自拍角度都用上被指最似楊冪嘅側臉，網友更笑言唔止樣似衫似，就連佢嘅姊妹都搵個同迪麗熱巴撞樣嘅女仔，以下兩張合照唔睇返最低嘅水印，都未必認得出邊個打邊個，下個走紅嘅唔知會唔會係呢位似迪麗熱巴嘅女仔呢？