ViuTV劇集《未來還未來》以偽紀錄片方式拍攝4位主角對成長的渴求，開播以來，觀眾評價一致向好。主角之一嘅劉俊謙放棄男神形象，走去扮來至廣州的老臨，一樣煞食兼好笑；選美節目出生嘅羅伊婷（Daisy）扮零人氣KOL，開live無人睇、自己俾錢買product扮有贊助，睇完真係笑咗出嚟；岑樂怡做一個服務性行業的女仔，一時少女一時成熟，拿捏得剛剛好；近年幫Viu主持過唔少節目嘅黃奕晨，郁啲就走入老闆房嘈，講嘢句句有粗口，百分百憤青一名。

對於觀眾嘅評價，黃奕晨接受電話訪問時，表示都睇過唔少，更笑言：「好介意啲人點睇我。」對於劇中頻頻爆粗被嘟，黃奕晨透露拍攝時跟劇組也有顧慮過，更為此拍過兩個版本。問到爸爸夏雨對其演出有何評價，他輕嘆了一聲：「佢喺溫哥華呀，我都好想佢睇睇。之前我拍果啲，都係要我迫佢先睇。佢試過睇完《SE7EN 2》，然後望住我『嗯』就走咗，咁即係點？」為怕老竇劣評，黃奕晨說沒有追問「嗯」到底表示什麼。

黃奕晨於劇中郁啲就爆粗發脾氣，他認為跟自己差別甚有距離。「我脾氣好好，不過拍之前幾個星期我好少嘢就發脾氣，因為想試吓個感覺，平時太hold back自己。原來又幾好喎，而家一有嘢就出聲，搞到好似愈來愈少朋友。」劇中每集都有一個主題，最新一集為「機會掌握在自己手中」，黃奕晨表示非常認同。「好多人都話我係靠老竇入行，咁呢個就好明顯係㗎啦，但人哋之後擺我埋一邊唔用，你又可以點？」對於不時被嗌夏雨仔，黃奕晨說希望數年後大家可以改口，又指因爸爸之名，令他感到不少壓力。「都聽過唔少閒言閒語，唯有當大家係想教我囉。又試過拍《未》時，想問啲前輩點做得更好，佢哋反問我『你老竇無教過你㗎咩？』」拍罷《未》之後，黃奕晨透露有報名學戲劇。

《未》找來不少串星，當中包括歌手李拾壹，早前拍攝外境時，李拾壹更突然於馬路中心做「側手翻」，非常跳脫。雖然只係客串一兩集，但黃奕晨就話想同李拾壹再結片緣：「我想同佢再做對手戲！做情侶囉，橫掂大家都熟晒囉！拍攝個陣同佢日見夜見，成日都同佢傾女仔㗎啦！」