【專訪】吳雨霏放棄追逐名利　享受做義工：我連退休都諗埋

「退休我都諗埋，就係買塊田自己種菜。」
「喺蒙古住campsite，廁所只係掘出嚟嘅一個坑，7日無沖涼。」很難想像這番話是出至開過紅館又拎過叱咤女歌手獎，剛剛去完米蘭時裝周嘅吳雨霏口中。

婚後，吳雨霏選擇了讓事業稍作停步，但她的生活反而更精彩：學日文、學陶瓷、種菜、做義工、慈善採訪。入行15年，唱歌、拍戲機會不斷，但經驗多不代表視野寬，她說自己好像從未接觸過外面的世界。「以前將搵錢、工作放第一位，成個世界就好似得自己咁，但去完蒙古之後，會有好多反思，好想盡力去幫人，其實你幫人的同時，亦都係幫緊自己，我每次做完義工返到屋企都會好開心。」

對於義工或是助養小朋友，吳雨霏說剛入行時，因工作關係而接觸，但其實一直並沒有了解背後的意義，如今說來也有點慚愧。直到近年先後與宣明會到蒙古探訪，在非工作性質下，令她可以與當地的小朋友相處得更自在。「蒙古最大問題係酗酒，變相會有好多家庭問題、街童。我哋同啲小朋友去咗一個campsite，雖然佢哋物質上乜都無，但你會感到佢哋係知足同珍惜，食完飯又會自己去洗碗。」

令她印象最深刻的是小朋友齊齊走入吹氣泳池玩，不到5分鐘池水變為污黑，但小朋友仍然笑容燦爛。「在當地7日無沖涼，聽落好似好污糟，但真實又唔係一個問題，因為focus都在他們身上，你只會想給予更多的愛，我7日佢哋可能係7個月無沖涼。」每晚臨睡前，與百多個小朋友一齊圍圈唱歌，那種震撼與感動，大概會成為她一輩子的記憶。而她更希望將來可以帶同自己的小朋友到蒙古一次。「我好鼓勵大家出去睇，因為同你睇相或viedo好唔同。」她笑言探訪回來之後，不時向身邊好友講完又講，最終成功「導」了朋友去探訪，對她來說，也是一種小確幸。

兩次的蒙古探訪，吳雨霏說看到老公不再怕怕羞羞，願意主動跟小朋友玩樂，對他們來說算是一個很大的改變。「回來之後都同自己講要幫得就幫，當然一開始都會諗咁多人，點幫，但其實幫到一個已經有好大差別。」她一方面想用藝人身份去令更多人認識宣明會，但一方面又擔心焦點模糊。「後來覺得自己舒服就得。」半年前，吳雨霏亦開始在匡智會做義工，問到是什麼原因驅使她有這些舉動，她說是3年前開始接觸的宗教所致。

「爸爸好勤力工作，所以自己都受到影響，但好似係追求錯目標，成日就淨係掛住工作，自問以前成績都唔算差，但個人係唔開心。做完第二次紅館，咁又點？永遠都唔知追求什麼，每晚返屋企都問自己到底做緊乜。」盲目追求名利，令她對身邊人少了一份關心，被指冷漠、被指寸時有發生。愈做愈沮喪，她試過因而在家中無故大哭，為怕家人擔心，又不想打擾朋友，唯有與神對話。「講完之後，整個人都好peaceful，為什麼會有如此強烈感覺呢？於是開始返教會。」與神的接觸，對吳雨霏來說，或許不是偶然，因為老公與其家人是個虔誠的基督徒。

當名利不再重要時，工作的腳步也自然放慢，吳雨霏說最感恩是公司的理解。「以前公司想我一年出兩隻碟，但而家唔會囉。而家只係會諗我啲菜係點、做嘢都會想6點前收工。」說罷，連她自己也忍不住哈哈大笑，「因為老公係返朝九晚五，我一定要那段時間同佢食飯，我連退休都諗埋，就係買塊田自己種菜。」看到筆者有點懷疑，她說現時家中也有種菜，所以將來也一定會種。「我知你係好難接受，哈哈！」能夠有得揀當然係最好，況且她有條件去揀。「但唔排除有日好想再衝，同埋公司都好想我再開紅館，自己都掛住，但我又未去到一個係非開不可的地步，我而家想要平衡點。」

攝影：江智騫
化妝：jessicachan_makeup
髮型：Sing Tam@pi4.hk
服裝： Amenpapa, Mo & Co
場地提供：唐三樓 Second Floor