吳若希同Alex Ho終於結婚　唱片公司簽字做人妻：唔想大排筵席

恭喜晒！吳若希（Jinny）正式成為Alex嫂！今日Jinny終於同拍拖差唔多兩年的澳門才俊Alex Ho結婚喇，今年Jinny誕下女兒Giselle後，大家就一直猜測佢兩個幾時會正式成為夫婦，大家都擔心拖得愈耐就愈危險，而家Jinny的粉絲終於可以放心喇！雖然今次只是簽字儀式，並沒有大搞，地點亦只是在星夢唱片公司的辦公室，不過一切都不重要，最緊要係兩個心連心嘅心給大家的一個肯定啫。

Jinny在接受TVB娛樂新聞台訪問時表示：「比我想像中無咁感動，因為大家都話會感動到讀唔到誓詞，但係我哋完全覺得自己浸淫喺歡樂當中，其實係幾搞笑同幾開心嘅。我哋無乜蝦碌嘢，因為簽字都只係個簡單過程，最蝦碌就係份誓詞寫得唔夠詳盡囉，例如婚後啲財產，錢邊個管呀，但係成個過程係開心嘅。點解要喺唱片公司度搞呢，除咗可以請埋我老闆（何哲圖）見證之外呢，呢個地方係我簽重要合約嘅地方，咁今次呢個都係我人生一個幾重要嘅合約，所以揀呢度。」

被問到會唔會擺酒，她說：「大排筵席其實我哋都唔係咁想，始終我哋都係年輕人嫌麻煩，好彩兩邊屋企人都好開通，無話一定要咁做。可能會請一班最close嘅親戚朋友去旅遊結婚，再有行禮個過程，證件上面就而家拎咗先。我都希望有個教堂正式行禮，但始終又係嫌麻煩，簡單為主喇，好似今日咁，律師哥哥都有問我哋會唔會著婚紗，我哋都話唔好喇，著呢啲靚衫都係留返台慶、亮燈、頒獎禮喇。（老公有無求婚呀？）不如你去問吓佢喇，點解婚都結埋都仲未求婚，我又無話特別去諗嘅，不過如果有就更加開心喇，佢係嗰啲食食吓飯就話結婚喇嗰種人。」一切從簡都真係幾好呀，最緊要都係兩個人大家夾到。