話說噚日(15日)打風，好多人滯留咗喺機場上唔到飛機，無綫新聞就搵來一眾受害人做訪問，其中一個咁啱就係洪天明。天明就話自己因為青嶼幹線大塞車，唯有改搭機場快綫，本身要去馬來西亞嘅佢，仲有老婆周家蔚帶埋兩個小朋友送機，可惜都係趕唔切。本身件事都無乜特別，不過奇就奇在當畫面出街嘅時候，顯示名稱竟然係用洪先生而唔係洪天明，咁究竟係記者真係唔知佢係邊個，定專登唔出名呢？至於隔離台嘅有線新聞就照出返洪天明全名，事件認真奇怪。

佢兩個兒子十分可愛！

不過其實類似事件已經唔係第一次發生，2年前的農曆新年，蘋果動新聞到訪街市訪問市民買雞過年，又咁啱俾佢撞到劉青雲，於是就訪問咗一輪對買雞嘅睇法。不過之後個名又係出市民劉先生，唔通唔係娛樂版就唔可以出全名？但呢兩個人應該大部分香港人都識架喎。又唔係次次都先生前先生後咁當係路人甲嘅，喺08年周潤發去九龍城街市買菜，一樣被無綫互動新聞台捕捉到，今次係出返周潤發全名喎！唔通真係要去到發哥咁嘅地位先可以出全名？