NBA華人球員林書豪，同唔少圈中熱愛籃球嘅藝人，好似周杰倫、蕭敬騰都非常熟稔，林書豪19號代表籃網出戰溜馬，估唔到今季上陣第一場，就喺第4節受傷換出，籃網官方確認，林書豪右膝髕腱斷裂，今個賽季報銷。一眾好友包括周杰倫、蕭敬騰、陳建州等都非常擔心，周董希望粉絲齊齊為林書豪打氣。

林書豪喺對溜馬嘅NBA比賽中，第4節臨完場前4分53秒上籃失手，單腳着地弄傷右膝。當時林書豪屈膝坐地大叫「I am done!  I am done !  I am done!」（我完了），面容扭曲，狀極痛苦。林書豪賽後於Twitter 留言「Gods ALWAYS faithful and in control」（神是永遠信實和主宰一切的），並附上祈禱打氣手勢符號。其後籃網官方確認，林書豪右膝髕腱斷裂，今個賽季報銷。

曾經自導自演電影《功夫灌籃》嘅周杰倫，私下同林書豪係好朋友，知道佢受傷後非常擔心，先後於IG及Facebook出post：「Lets all wish @jlin7 the best, hope he gets better soon，一起為他加油！」而蕭敬騰7月中剛剛同林書豪打過一場表演賽，亦喺Facebook留言：「書豪兄加油！看了影片都難過~」

自參加2010年NBA選秀之後，林書豪一直備受關注，曾經單場比賽得分38分，成績僅次姚明，2011-12年效力尼克時帶起過一段「Linsanity」瘋潮，後來因為左膝半月板撕裂，宣告最後17場報銷。呢次林書豪右膝臏腱斷裂，恐缺賽本季剩餘81場賽事，將會係佢NBA生涯最嚴重嘅運動傷害。