一套戲再好睇，都不可能單靠幾位主角配角就拍得成，行街仲有路人，去餐廳食飯都要食客，一直以來呢班片場中不可或缺嘅人，當然知道唔少秘聞。ViuTV節目《又要威又要戴頭盔》呢日搵來4位臨時演員，分享入行以來光怪陸離嘅所見所聞。仲意外爆出，臨記除咗拍戲行行企企，原來政治活動真係會搵佢地幫手撐場，仲好好Pay添﹗

身為臨時演員領班嘅阿鵬入行多年，佢爆出有認識嘅人，收錢參加政治遊行：「曾經有啲JOB係政治敏感時，需要人手支持某個組織，睇新聞時認出有啲係識嘅，明明早兩日撐另一邊唔係咁諗噃，我唔講邊一邊啦，但原來幾好Pay，係平時做老臨嘅幾倍人工，如果做啲比較激進動作上報，可以係十倍或以上。」聽到主持人余迪偉林二汶都不禁O晒嘴。

雖然臨記通常戲份唔多無咩對白，有時連樣都見唔到，但其實行有行規，第一項天條就係 --- 唔好望鏡頭﹗「有啲女仔真係專登行過嘅時候望一望鏡，扮晒對鏡頭好敏感，結果當然要NG啦﹗」有啲就好專業嘅，就好似《喜劇之王》中嘅尹天仇一樣：「有個臨記走去問導演，等陣想我點樣笑呀，大笑定傻笑？但其實鏡頭唔會影到佢只係要啲笑聲，大家當然唔理佢啦。」

另外有一次就比較搞笑：「喺旺角街頭拍一場戲，導演叫我地扮傾偈，同我一齊個呀叔忽然問我，見唔見到好大胸嗰個臨記，仲要做埋手勢比個SIZE出嚟，好在嗰日導演心情好，嗌CUT之後話：好鍾意大胸嗰兩位大佬，如果你地傾得細聲啲就PREFECT啦﹗」亦試過導演明知兩個臨記有私怨，拍場打交戲時安排佢地對打，結果一個眼腫另一位雙手傷痕累累。

作為片場中食物鍊最低層，拍攝環境無論幾惡劣，例如喺草地扮婚禮賓客，被蚊咬幾十啖，都唔可以郁唔可以抓癢，只能頂硬上。更甚者仲有生命危險：「試過去一個叫太陽谷嘅地方曝曬拍戲，我呢啲大男人曬十個鐘都頂唔順，眼見中暑暈完一個又一個，叫場務一係買水返嚟一係報警，擾攘咗好耐先肯去買啲水返嚟。但後來俾我地知道，買水前佢地買咗一堆支裝飲品，淨係俾工作人員飲，臨記係無份。」

人工唔高工時又長，但片場中亦有開心嘅時候，佢地話好多藝人鏡頭前後差別好大，不過就唔係變臉人品衰：「有啲演員喺鏡頭前係謙謙有禮，估唔到一CUT機就爆粗，粗口仲流暢過我地﹗」個樣惡形惡相，亦唔一定係壞人：「大佬B(吳志雄)走嚟，可能見我地細個傾下計，嚟緊個鏡頭導演會咁咁咁拍，你咁樣做就啱架啦，專登教我地點樣可以做得好啲。」「有次成班男人好似B哥、譚詠麟喺度互X，講波講政治講粗口，好似地盤佬咁，有時行過又撩我地傾計，好NICE架」張敬軒又會叫佢地快啲食飯先，令佢地都覺得好感動呀。」