《開心速遞》的Terry（李偉健）因生硬演技，成功跑出，被網友稱為世界級和御用戇居仔，戇居地位在TVB看似冇人能及，但其實無綫有另一位演員可以挑戰Terry，那就是50歲鄭健樂Rocky，Rocky和Terry同樣是參加《香港先生》而入行，他是05年那一屆，選港男後開始入劇組，多演健身教練或大隻佬，不過表情比Terry更加生硬，網友初時都覺Rocky演出不合格，可以用完全不懂演戲來形容，但各位只要細心欣賞，慢慢發覺他的演戲方式是獨有的，聽住背書式讀對白，網友就話簡直是一種享受。

Rocky雖然演出有喜感，但重戲份角色不多，不過如果是Rocky粉絲，一定必睇上一輯《愛‧回家之八時入席》第862集，劇中Rocky難得可以有個人表演，劇情講飾演健身教練的Rocky，因為不滿何君誠的佣金分紅而鬧離職，最後又要求張振朗幫手復職，Rocky由頭到尾，演技極之有發揮，喜怒哀樂，情緒大起大跌，絕對是Rocky代表作，亦是網友心目中最神的一集《愛‧回家》。對於網友想Rocky亂入《開心速遞》，Terry亦表示歡迎，原來二人亦是朋友，他說：「我識咗佢好耐喇，可能大家都鍾意健身啦，其實我哋喺第一輯《愛‧回家》已合作過，但我都唔記得係邊集，100集之前，我都想同佢合作，當然想佢入組啦。」希望《開心速遞》劇組，回應網民訴求，等Rocky入埋組，跟Terry同 KC一齊互動下就真係無敵。