【獎門人.回帶】陳小春玩英文版大電視 用幾個英文單詞輕鬆過關

撰文:李妍樺
出版:更新:

陳小春最近因為參與大陸親子真人騷《爸爸去哪兒5》再度走紅,香港藝人普遍講普通話都比較差,好似古天樂咁,陳小春當然都唔例外,為咗費事講到一舊舊,所以有時候陳小春會講英文去代替。節目開初陳小春成日鬧Jasper都係用英文單字,比較少可以講到完整句子。相比起Jasper一口流利英語,有時陳小春時不時都會請教返Jasper英文,好似之前佢私底下問過Jasper「污糟」英文係咩,陳小春寧願經過一輪翻譯波折都唔肯講中文,就連老婆應采兒都話過佢:「其實我也不明白,他爸明明英文不好,為什麼要狂說呢?」

陳小春連鬧囝囝Jasper都要用英文鬧。(網上截圖)
應采兒都話過陳小春英文唔好。(網上截圖)

近日KOL King Jer回帶提起洪天明係上過最多次《獎門人》同拎過最多獎品嘅人,睇返以前嘅獎門人節目真係好懷念啊!其實陳小春同應采兒當年都有拍住拖上08年嘅《鐵甲無敵獎門人》,經典環節當然有用口傳紫菜同估大電視啦,應采兒同EO2嘅Otto玩傳紫菜時,曾志偉仲抽水笑話:「要小心陳小春!」

而重頭戲當然係陳小春玩英文版大電視,平時用中文玩已經好難估,加上陳小春英文程度有限,對佢嚟講真係相當大挑戰,真係戥佢擔心。第一題係蘋果,陳小春就形容係「Vegetables like bananas but red color」,大家都聽到一頭霧水,佢再補一句「Washington」,大家即刻就估到係蘋果。之後題目係三點式,陳小春繼續單字攻勢「Ladies, swimming」,大家依舊都係聽唔明,之後佢指住身邊上下兩個重要部位講「One, two, three」,真係一講就明。雖然英文唔好,但陳小春用幾個英文單詞就講得明人,都算係轉數幾快,最後因為係估中得最多嘅一組,獎門人曾志偉仲加時畀陳小春都玩多次大電視。

唔知大家估唔估到呢?(網上截圖)
大家不妨睇吓陳小春表演,其實佢講英文都幾搞笑:
+13
你可能感興趣