《天與地》三子走剩1個？ 54歲黃德斌傳離巢：合約仲傾緊
TVB又有人離巢？講嘅就係在2015年TVB播出的劇集《刀下留人》中，演活置人於死地的劊子手葉常綠這個角色的黃德斌，雖然該劇是他首度擔正但演技備受觀眾喜愛。可惜近年黃德斌就未有太大代表作，而日前更有網友在討論區開post直指德斌即將離巢，記者為此就致電向他求證，德斌聞言後就話，「邊個話你知㗎?係邊度聽返嚟? 其實份合約仲傾緊，可能會係以另一種方式合作！」其實如果藝人沒有離巢的打算，大多數聽到這些消息都會話「我份合約仲有好長喎」、「完全無啲咁嘅事」，但今次德斌甚為緊張向記者查詢消息來源，相信網友的留言都未必唔係真。
黃德斌透露合約好耐之前已在洽談中，「因為嗰陣咁啱開緊另一套劇，咁而家就返到嚟就繼續傾咁，我都唔想講咁多嘢喇。（合約幾時到期？）呢啲唔方便透露。」其實近年德斌的工作都比較多在內地，他亦透露現正在內地忙於排練舞臺劇，好似今年7月他就拍攝好友兼前TVB監製戚其義的內地電視劇《荔芳街之海岸風雷》,集數更長達七百多集，問到是否意味著之後的工作重心都放在內地時就表示，「都無話特定係邊度做嘢，做演員都希望有唔同合作嘅空間。」
雖然德斌已經澄清仍在洽談中，但其實在討論區上有不少網友對於德斌即將離巢一事好驚訝，並覺得對方在2015年拍攝完《鐵馬戰車》及《刀下留人》後，未有太多戲劇作品，他說，「呢啲公司都係公司安排。（會唔會失望？)無話失唔失望，演員都係被動，所有工作都係等公司安排。」
提到2011年《天與地》風格大膽創新被譽為神劇，劇中飾演鼓佬的林保怡同佘詩曼都相繼離巢，現在又傳出黃德斌離開TVB，只剩下陳豪一人仍在TVB工作，問到會否感到可惜時，德斌就笑言，「都無話可唔可惜，將來都可以再一齊合作，邊個係TVB邊個唔係TVB都可以一齊合作，而家有咁多平台開戲，當然最好公司而家再開戲俾我地3個再拍！」
現年54歲的黃德斌1987年就開始入行，當年就參加第14期藝員訓練班，同班有黎芷珊、劉錫明、林家棟及雷宇揚。後來經朋友的介紹下轉戰影圈，仲做副導演、場務同服裝設計助手等。可惜他在1993年約滿後未獲TVB續約，直到1997年才重返無綫，並開始接拍長篇劇《真情》，飾演梁家明（越南）一角。角色深入民心，仲有觀眾以為佢真係越南人。提到獎項，就一定要講黃德斌在2006年台慶中，憑劇集《火舞黃沙》奪得最佳男配角獎項。但音樂方面， 黃德斌就竟然拎得最多獎，因為2012年與林保怡、陳豪合唱的《年少無知》，更在叱咤同十大中文金曲頒獎禮上奪獎,風頭一時無兩！