歷屆華姐出產唔少靚女，廖碧兒、鍾嘉欣、李亞男、岑麗香、張曦雯等都由此進入娛樂圈。新一屆華姐又出爐啦，不過就唔係TVB攪嘅國際中華小姐，而係鳳凰衛視主辦嘅中華小姐環球大賽，28號晚喺珠海舉行總決賽，所有入選佳麗都係90後，係就係活力十足啦。不過相對佳麗靚樣，更吸引網友注意，係一套套復古味濃嘅服裝。

自從今年港姐冠軍雷莊𠒇出爐後，佢極富自信嘅表演盡失民心，令網民開始去搵其他選美比賽得獎人作出比較，國際小姐澳門代表麥嘉欣（Sofia Pavia），同埋香港代表王詠珩都令大家眼前一亮。國際小姐選美過程只需進行面試，泳衣環節欠奉，但由於面試是分開進行，所以對手有幾多人，參賽者亦不太清楚，令大家驚覺原來選美唔一定有泳裝同問答環節架。

鳳凰衛視主辦嘅中華小姐環球大賽，28號晚喺珠海舉行總決賽，搵來柯有倫擔任表演嘉賓，同樣地係無泳裝環節。12位90後佳麗分為3組，比賽跳舞唱歌同敲擊表演，再進行問答環節。最終由現年22歲李明子問鼎中華小姐總冠軍，而亞軍及季軍分別是26歲的梁思遙和22歲的郎悅祺。

冠軍李明子係賽前大熱，來自武漢體育學院播音主持與藝術專業，內蒙古朝鮮族姑娘，身高171CM，眼大大鼻高高典型美女樣貌，總決賽中於跳舞組別表現出色，問答環節口才出眾，成功脫穎而出。網友對佢勝出都表示合理，不過對比賽中嘅服裝就更多意見啦，民初FEEL旗袍、復古晚裝裙、普通TEE當跳舞衫，加上表演嘉賓柯有倫套杏色西裝，都仿如回到20年前，唔通又想食下集體回憶呢條橋？