【TVB節目巡禮】胡定欣田蕊妮2018年減產 28歲朱晨麗獨攬四套劇
撰文：郭敏玲
出版：更新：
TVB今日喺會展大搞金禧晚宴兼2018節目巡禮，介紹來年劇集，順便吸下客。推出劇集嘅同時，有邊個未來會多産擔正，都係一大重點。以2018年來講，男演員嘅産量都幾平均，上屆視帝陳展鵬、三屆視帝黎耀祥同今屆視帝王浩信都只係暫時得一套劇，袁偉豪就好少少，有《再創世紀》同《棟仁的時光》。
唔知係咪要年輕花旦上位，視后胡定欣同田蕊妮都少咗產量。（黃國立攝）
反觀女演員，情況就大所不同，分布亦好明顯。被三哥苗僑偉力撐拎今屆視后嘅黃翠如，下年暫時未有劇拍，同田蕊妮一樣。就連兩屆視后胡定欣，都係得《宮心計2深宮計》，張曦雯都仲多過佢哋，有《跳躍生命線》同《十兄弟》。反而28歲嘅朱晨麗好多產，一共有四套，一季播一套都得，包括《平安谷之詭谷傳說》、《兄弟》、《特技人》及《棟仁的時光》，四套就有兩套擔正，《棟仁的時光》仲跳埋鋼管舞！
朱晨麗而家仲拍緊《兄弟》，又係女一。（黃國立攝）