【哈利波特】「張秋」同香港藝人好有緣 梁佩詩同吳雨霏係好朋友
撰文：洪曉璇
出版：更新：
《哈利波特 – 神秘的魔法石》喺16年前嘅11月份上映，全球票房大收，其後呢個系列8集電影陪伴大家足足十年時間。戲中嘅小演員都長大成人，喺電影界發光發亮。除咗哈利、榮恩同妙麗，飾演哈利仔華裔初戀女友張秋嘅梁佩詩，都令人印象深刻。最近佢喺新戲飾演成龍嘅囡囡，原來佢同香港娛樂圈都好有淵源架。
當年只有17歲嘅梁佩詩擊敗近五千位對手，成為哈利波特初戀女友張秋。(資料圖片)
英國蘇格蘭馬瑟韋爾出生嘅梁佩詩Katie，有兩個兄弟及一個妹妹，父母是香港人，爸爸於當地經營餐廳及快餐業務，當年JK羅琳為咗搵符合張秋氣質嘅演員，喺英國進行海選，當年只有17歲嘅Katie擊敗近五千位對手脫穎而出，喺2005年嘅《火盃的考驗》中奪去哈利波特螢幕初吻，得罪唔少女粉絲。Katie亦有參與系列中後嘅電影，好似07年《鳳凰會的密令》及09年《混血王子的背叛》都有佢嘅身影。其後一邊進修一邊拍攝電視劇及舞台劇，2009年到倫敦藝術大學修讀攝影，3年後考入蘇格蘭格拉斯哥音樂學院攻讀戲劇。
呢一吻令梁佩詩得罪唔少哈利迷。(資料圖片)
哈利波特後Katie主攻電視劇及舞台劇， 2014年，她更憑《Run》奪得英國BAFTA的最佳突破獎。(IG圖片)
梁佩詩喺新戲中飾演成龍囡囡，雖然只得幾分鐘戲份，但對劇情推進非常重要。
剛剛踏入30歲嘅Katie最近參演由《新鐵金剛智破皇家賭場》導演馬田金寶執導、成龍及皮雅斯布士南主演嘅新戲《英倫對決》。飾演成龍囡囡嘅Katie，某日返學時被愛爾蘭共和軍炸死，成龍為女兒報仇決定親自緝拿兇手。去年拍攝時Katie都有上載同成龍嘅合照仲寫上「With the legendary JC」。
喺好多外國華人心目中，成龍的確係個傳奇，難怪Katie要孖住哎呀爸爸合照啦。(IG圖片)
Katie曾經喺07年於倫敦拍攝古巨基《愛回家》MV，飾演基仔女朋友。(網上圖片)
除咗成龍，其實Katie同香港娛樂圈都頗有淵源，2006年曾經傳出唐季禮執導嘅電影《花木蘭》想搵佢擔崗演出，07年Katie成為古巨基歌曲《愛回家》MV女主角，佢仲專登飛返香港睇古巨基演唱會添。唔講唔知，原來Katie同Kary吳雨霏都係好朋友，佢地頭貼頭合照，Katie仲寫上「My beautiful HK buddies」，不過大家都好奇佢兩個係點識架呢？
07年9月Katie受邀返港欣賞古巨基演唱會。(視覺中國)
估唔到Katie同Kary吳雨霏係好朋友，到底佢地點識呢？(IG圖片)
+11