鄭欣宜早前放假去咗外地休息，不時透過ig報告自己行蹤，但今早佢就喺社交網站上載3段短片，話自己早幾日跌斷咗隻腳，要入院做手術，但為怕大家擔心，所以今日先話俾大家知，但沒有交代因為什麼原因受傷。「而家係10月31號朝早10點10分，我而家喺養和醫院嘅病房入面，因為我跌斷腳，啱啱見完主診嘅骨科醫生，呢兩日都同我講話我要做手術，因為除骨斷咗之外，我腳骨移咗少少位。」

欣宜愈講愈擔心，本身已經眼濕濕嘅佢期間一度喊到講唔到嘢。「會唔會似番我之前嘅靈活性呢，大家都知喺台上面我好紮紮跳，我好鍾意跳舞，我好驚做完手術隻腳會唔似之前咁靈活……」欣宜指自己因為4月有演唱會，所以希望以最佳狀態示人，但做完手術之後，怕會有一定影響。「大家放心我唔會因為呢一隻腳停咗我，阻止我嘅紅館夢，大家可唔可以為我加油呀？」

欣宜上載影片之後，唔少網友都留言叫佢加油努力，仲希望佢早日康復。