微博坐擁2千4百多萬粉絲，全中國幾乎無人不識嘅William陳偉霆，無論被困電梯還是自娛跳手指舞，一舉手一投足都可以引來陣陣尖叫聲。雖然William於內地以拍劇為主，但跳舞出身嘅佢從未放棄至愛嘅街舞，最近佢同韓團f(x)成員宋茜出席品牌活動時，更即場挑機Battle，面對超強對手，William使出渾身解數，冷帽蒙眼跳機械舞，型得嚟都要小心睇路呀。

陳偉霆同宋茜著上白色上衣加上貼腳牛仔褲，情侶裝拖住手現身四川成都一個品牌活動派對，William做主動先行出招跳機械舞，腳法快到差啲睇唔到，又不時向台下飛吻引來陣陣尖叫聲。就讀北京舞蹈學院又係韓國著名女團f(x)隊長，宋茜當然亦不甘示弱，面對Wiliiam快如閃電嘅舞步，扭腰擺臀突顯S曲線，踢腿畫圈意態撩人，以慢打快一樣功架十足。

Krystal@f(x)來香港竟然鞠躬行禮　鄭秀文定CHANEL高層咁有face？

面對勁敵，William都唔敢怠慢，唔知係咪想表達出舞蹈至高境界唔使用眼睇係用心感受呢，他將頭上冷帽拉落嚟遮住對眼又嚟一輪勁舞，又拎起衫腳當裙擺揮舞非常佻皮。兩個人熱舞3分幾鐘後William一手拖住宋茜離開舞台，呢個回合Battle，打和﹗嚟緊William又會同前韓國男子組合EXO成員鹿晗，齊齊擔任《熱血街舞團》跳舞導師，唔知到時又會唔會同鹿晗上台較勁呢？