潘瑋柏肺炎初癒　演唱會台上吸氧嚇壞歌迷

7號晚潘瑋柏飛到深圳出席音樂會，根據現場觀眾分享，潘瑋柏跳唱兩首歌之後，喺台上拎起氧氣罐吸氧，望落好似有點辛苦，嚇壞台下觀眾，令人擔憂。事後潘瑋柏於微博留言報平安：「昨晚來看深圳演出的朋友們別擔心 ，我好的很。台上吸氧只是身體完全恢復的一個過程。我還是百分之兩百給你們。 所以別擔心，你看看，演出結束後我們還在『硬鬧』。」更附上兩張後台同工作人員影嘅合照，睇落潘瑋柏似乎無咩異樣。

現年37歲嘅潘瑋柏出道16年，係台灣著名跳唱歌手。10月初傳出佢健康亮起紅燈，上載一張吊住鹽水嘅相片寫上：「這幾天，都在這」，據知當時連續發燒4日，其後再傳出佢因嚴重流感引至肺炎，一度傳出病危要用氧氣罩輔助呼吸。直至10月27日潘瑋柏上載照片，承認曾被醫生告知病危，但已經康復出院。不過見佢呢次喺台上仲要吸氧氣，睇嚟仲需要啲時間先回復到以前嘅狀態啦。