TVB 50集長劇《誇世代》非常大堆頭，男女主角已經五隻手指數不完，他們開始陸續登場，昨晚就有森美。他一有出場就是赤裸上身，猶如彭于晏上身，在擂台上激戰。在昏暗的環境下，有聚光燈投射他身上，健碩身形表露無遺，不論男女都大讚他FIT得好有型，是他人生最顛峰的狀態。現年43歲的森美，坦言相比十年前，用多了一倍時間操肌。雖然如此，但仍能夠操得一副好身型，還要「自己身型自己操」！提起不少有意操肌的男士的興趣，到底靚肌是怎樣煉成的？

森美形容拍《誇世代》是一個好機會讓他減肥再操Fit，他自言這個身型未算最完美。由收到拍劇消息開始，森美就開始操肌計劃，為時大約三個多月。「打拳呢一幕雖然出咗分幾鐘，但就用咗好多時間去準備，初時都好辛苦㗎！」有做過運動、操過肌的人都知道，變大隻真的不易，時刻都要「畀啲掙扎」，如果請教健身教練，或多或少會為荷包肉赤。森美今次操肌，完全自己一手包辦，在網上搜集資料、收看短片參考重量訓練組合等，然後每日計足攝取食物的卡路里。「冇健身教練跟，好多時就要提醒自己，但人類嘅腦好得意，一開頭你會覺得好辛苦，但係慢慢習慣咗之後，大腦就會有個信息，就係呢個時候可以唔食嘢住，真係見到嘢食都唔會想食。」而這個過渡期，森美就話大約兩個星期左右。

經過森美細心研究健身方法之下，他就概括了三方面的策略：飲食、健身及運動。之前森美都有分享過「斷食法」，比例就是8：16，有8小時進食，其餘時間就不能吃東西，那麼森美一天的餐單是甚麼呢？「一朝早就真係好簡單，就咁兩隻雞蛋，加個蕃薯同埋一隻香蕉；然之後晏晝同夜晚點都會食肉同澱粉質，因為我唔淨止要瘦，係要長肌肉，咁之前拍劇個效果要再好啲，先至會飲啲健身奶粉。」第二步操肌肉，就需要重量訓練，森美就話沒有健身教練督促，有時候會用多了時間，而他講到重量訓練的重點：「如果你舉某個重量，唔能夠連續做8下呢，咁就係太重，咁你就要調整到合適嘅重量，再一組組咁做。」至於運動，其實做甚麼都可以，不過森美今次劇情需要，就特地學打西洋拳：「我本身都有學過泰拳，但係有姿勢冇實際個種，今次就用咗一個月去學西洋拳，因為咁燃燒脂肪，三管齊下就練咗啲成績，都ok喇。」爆肌身型在森美心目中只是OK，他真是非常謙虛：「其實可以再好啲㗎！不過而家都有keep住個身型，如果下次再有機會，我可以再盡啲再大隻啲㗎！」

森美後來講到上一次為演出而操肌，已是2004年的《我要做model》，他坦言隨住年紀不同，操肌方法都會有很大分別：「10幾年前我30歲，操咗一個月就好fit；今次再操呢就要用多一倍時間。因為人大咗，新陳代謝就會慢，所以就唔可以用節食嘅方法，因為代謝慢再去節食，效果就會比較耐同唔明顯，食量一定要有。」森美亦再強調：「如果只係瘦，其實真係好快，但如果你要有埋肌肉要好睇，咁真係要食足個卡路里，跟足晒，係要耐啲時間㗎。」各位想操肌，而且是自己肌自己操的男士，就要聽森美講喇！

森美現在一副完美身型，他笑言「自信真係返晒嚟」：「喺屋企都會唔著衫，打大赤肋咁行嚟行去。而家去啲時裝店唔會買衫，因為覺得件件衫著落去都好好睇，喺試身室試衫望住，就覺得好好睇！除衫望住塊鏡，又覺得好好睇！」森美還笑言囡囡開始拒絕帶他參與學校活動：「佢驚我行行下百萬行，無喇喇除衫！」聽到森美這樣說也忍不住大笑！森美43歲還操到咁fit，又talk得又演得，如此完美的他，對老婆來說會否是一個威脅，驚好多女仔同粉絲埋身呢？「可能係㗎！佢（太太）成日都覺得我操得太fit，去做運動都叫我唔好再做喇！出街食飯又成日食得少少，然後隊畀我食！叫我食多啲！不過我冇理佢呀！哈哈！」森美出名係好爸爸、好老公、好男人！點操肌都唔使驚喇真係！