呂良偉變萬能Key　除咗袁紹仲似Bruno Mars

「24 karat magic in the air」相信你睇到呢度，應該都知呢首歌係美國超人氣歌手Bruno Mars的作品。而近年有不少網友就發覺香港有位演員同佢撞樣，就係曾經飾演「達摩」嘅呂良偉。日前出席茶敘時呂良偉被問到知唔知自己有「香港版Bruno Mars」之稱時就笑言，「下，點會似我，我同佢好似樣㗎？」

呂良偉有咁嘅反應，原來係因為佢唔知Bruno Mars係邊個，記者即刻上網搵張相俾佢睇，呂哥一見到就話，「我唔知網友有咁講我，very good！」呂哥又點止淨係似Bruno Mars？其實他早前拍攝由周顯揚執導的電影《真．三國無雙》時，飾演「袁紹」一角，造型照曝光後隨即被網友大讚揀啱演員。因為他與遊戲版個樣幾乎係餅印，呂哥透露當時見到都嚇一跳，「我睇到個公仔都覺得好似，好鍾意！初時佢地設計我造型時話唔要鬚，但我就覺得如果唔要同公仔有出入，一試完個個都話有鬚似好多，所以就咁決定。」他其後亦大讚導演周顯揚拍得好用心，到時電影上映票房一定大賣！至於呂哥接下來的計劃，就是今個月27號在君悅酒店舉行拍賣會，「我同鐘錶商設計了3款腕錶，拍賣收益會捐給慈善團體。」