台灣天團五月天帶着《人生無限公司》去到北美7個城市巡演，完成西岸4場演出後，昨日去到紐約Barclays Center開騷，全場1萬2千個座位爆滿，天團魅力確係強勁。雖然當晚紐約氣溫只得8度，不過，五迷熱情不減，由開場《派對動物》、《OAOA》到《入陣曲》全程無甩beat。不過，當五月天唱到《戀愛ING》時，一個神秘嘅桃紅色bra竟然出現喺阿信同石頭之間，見慣場面嘅阿信緩緩將bra放到石頭肩膀上。唱完之後，石頭將bra掛到瑪莎結他架上，當全場大叫「L.O.V.E」時，阿信就好鬼馬咁問：「那是E嗎？」瑪莎神回一句：「沒有，它是B.R.A！」成功哄得全場大笑。

五月天第二次於北美巡演，雖然行程緊湊，但7場票房加埋就已經有近7百萬美金，收入極為可觀。阿信於台上頻頻放話，如果被五迷野生捕獲的話，「在咖啡店就請喝咖啡，如果在餐廳遇到就請吃飯。」瑪莎隨即笑問如果喺酒店遇到咁點算，多口表示「請住宿。」嘅冠佑即被指老婆唔喺身邊就搞搞震。