睇完成晚TVB的50周年《萬千星輝賀台慶》，要數令全場最爆笑兼最驚喜／驚嚇的一幕，相信非馬國明同阿Bob林盛斌咀咀莫屬喇，真係睇到全場嘩然㗎。呢幕是發生在馬明同阿Bob齊齊扮演經典劇集《上海灘》的男女主角，許文強和馮程程兩個角色，不過當然是搞笑版啦。

阿Bob扮演的馮程程明明自己走晒樣，但就話馬明所扮演的許文強個樣殘晒，馬明即笑言：「無辦法啦，我呢排晚晚揸的士。」之後阿Bob就叫馬明做個許文強最出名的天然呆樣出來，眾所周知天然呆其實是馬明的標誌，馬明似乎早已經同天然呆這個term劃上了等號。而馬明亦不負眾望，擺出副靚仔chok樣之後，即刻秒變樹熊上身的天然呆，同隻含住樹葉的樹熊真是一模一樣㗎。

馬明示範完天然呆，就來到極為震撼的一幕，而呢幕看來是臨場加插入去的，就是馬明同阿Bob情深相認後，站在兩人身後的林曉峰竟然突襲兩人，將兩人的頭推向對方令兩人瞬間咀咀，絕對係咀對咀堅咀落去！可憐的馬明和阿Bob完全來不及反應，驚嚇之餘咀到連樣都變埋。兩人掙脫即彈開九丈遠，馬明更立刻用頸巾抹嘴。而台下的人覺得嘩然之餘，都笑得好開心。田蕊妮仲話馬明咀了阿Bob一啖是好大犧牲。另外，王祖藍扮Celine妹妹都好搞笑，又玩那招「I am so so so....」仲有翻白眼同狂Fing手。