【又取西經】賀歲檔又有《西遊記》 嚴選歷年10個齊天大聖
撰文：洪曉璇
出版：更新：
歷年有好多小說改編拍成電影電視，金庸作品固然多，不過都不及《西遊記》厲害，一個取西經故事，單計亞洲地區已經拍咗近30個版本，嚟緊又有齊天大聖喺農曆新年檔期上映，《西遊記女兒國》公布最新海報，特技化妝厲害到，難辨孫悟空沙憎到底係邊位香港演員飾演。歷年嘅齊天大聖，你又最Buy邊個？
就咁睇呢張相，真係好難認出係郭富城，之前佢仲因為長期特技化妝導致皮膚敏感。(微博圖片)
《西遊記》呢個題材一向好受歡迎，最近幾年都有相關題材電影，不約而同放喺新年檔期，2018年亦唔例外，由鄭保瑞執導嘅《西遊記女兒國》，今日率先發布唐僧四師徒、國王、國師以及觀音大士嘅頭像海報。當中有3位主要演員，孫悟空、沙憎以及國師都係大家好熟悉嘅香港演員，你又認唔認得出佢地係邊個？呢次劇組搵嚟《戰狼300》特效化妝師Shaun Smith加盟，果然出神入化，望多兩眼都未必認得佢地三個就係郭富城、羅仲謙以及梁詠琪。
梁詠琪同羅仲謙喺戲中都有相當重戲份。(微博圖片)
原來最早期嘅孫悟空係岳華飾演，簡直係開心大發現。(資料圖片)
其實歷年以來，飾演孫悟空嘅演員多不勝數，最早嘅要數到上世紀60年代邵氏出品嘅五部《西遊記》系列電影，飾演孫悟空嘅大家而家間中都仲見到佢拍戲，就係岳華大哥啦，堪稱齊天大聖始祖。香港觀眾電視汁撈飯長大嘅一輩，最有印象應該係張衛健以及陳浩民呢兩個TVB電視版本嘅馬騮精，戲中口頭禪「YO！使乜驚呀！」深入民心。
80同90後香港人，最深印象嘅兩隻馬騮精應該係張衛健同陳浩民。(資料圖片)
周星馳版本嘅齊天大聖，睇一萬次都唔會厭。(影片截圖)
至於電影版本，又點少得永恆經典周星馳呢，喺《西遊記第壹佰零壹回之月光寶盒》以及《西遊記大結局之仙履奇緣》，將取西經嘅故事變為浪漫又爆笑嘅愛情電影，戲中多句對白好似「如果非要在這份愛上加一個期限的話，我希望是一萬年」，簡直係示愛必殺技﹗近兩三年又再一窩蜂拍攝孫悟空嘅故事，李連杰、甄子丹、彭于晏、黃渤、陳柏霖先後飾演過齊天大聖一角，你至愛嘅又係邊一個？
彭于晏喺《悟空傳》中飾演孫悟空，被譽為最靚仔嘅一個。(網上圖片)
甄子丹《西遊記之孫悟空三打白骨精》
李連杰《功夫之王》
林更新《西遊·伏妖篇》
陳柏霖《情癲大聖》