【連坐法】TVB封殺令雙重標準 周柏豪胡杏兒周秀娜無影響？
撰文：洪曉璇
出版：更新：
蕭定一旗下藝人包括張繼聰、鄭欣宜、胡杏兒、張智霖等呢一年以來，如常亮相TVB，點知忽然傳出因為官司問題，TVB決定全面封殺阿一旗下藝人，犧牲嘅又點止張繼聰一個，據知蕭定一旗下藝人全部無限期被TVB禁亮相，好似阿聰咁拍完嘅劇集即使播出，都唔需要佢出現宣傳。有傳鄭欣宜同BabyJohn都會被消失，年尾頒獎禮成為炮灰，但周柏豪又獲豁免噃，雙重標準好亂呀﹗蕭定一回應香港01查詢時就話：「我哋公司唔介意做或者唔做TVB嘅任何訪問。」
蕭定一近年於娛樂圈大展拳腳，簽下大批藝人。(視覺中國)
胡杏兒年初宣佈懷孕，8月飛到澳洲拍攝《胡說八道真情假期》，點計都係官司之後傾嘅合作。(Facebook圖片)
數阿一旗下藝人，其實好多位今年都有幫TVB工作，好似胡杏兒大住肚飛到澳洲拍攝《胡說八道真情假期》；周柏豪、連詩雅、何浩文拍《使徒行者2》；鄭欣宜、BabyJohn拍《老表畢業啦》，趙永洪嘅《踩過界》同《降魔的》等，官司都開展了一年，一直都相安無事，無端端因為咁而玩封殺，實在令人摸不着頭腦。
《使徒行者2》入面嘅樂少峰，令周柏豪打開內地市場。
鄭欣宜經常亮相TVB唔同節目，有傳因為封殺令佢喺年尾頒獎禮食白果。(視覺中國)
周秀娜首套TVB劇集，遠赴橫店拍攝《宮心計2之深宮計》，本身係今年台慶劇之一。(微博圖片)
傳聞指周柏豪、連詩雅、陳瀅等雖然同屬蕭定一旗下，不過因為經理人合約歸STARZ People，所以獲豁免於封殺名單之外。心水清嘅網友就話，TVB根本就係大細超，9月都仲播緊暑假先拍嘅《胡說八道真情假期》，又搵周秀娜首次拍TVB劇《宮心計2之深宮計》，如果要翻臉早應該喺去年官司開始就出手，網友質疑TVB係拎張繼聰嚟祭旗，引起大家對收視低迷嘅《誇世代》注意。
《誇世代》收視比預期低，有陰謀論指忽然推封殺令為引起大家注意。
蕭定一對TVB封殺令無有怕，回應都好有火藥味噃。(視覺中國)
我地向蕭定一公司查詢關於封殺一事嘅傳聞，回覆話：「每間公司有每間公司唔同嘅政策，我哋公司唔介意做或者唔做TVB嘅任何訪問。」另外趙永洪亦係阿一旗下藝人，佢有份參演嘅《降魔的》將會喺星期日晚播出大結局，台前幕後會一齊睇直播，據知趙永洪亦有收到邀請，但他當日有TVB其他劇集通告未能出席。咦，說好的全面封殺呢？
唔講大家未必知，趙永洪都係阿一旗下藝人，不過呢幾日都繼續開工拍TVB劇集，無封殺喎。(影片截圖)
+3