《TVB星光薈萃頒獎典禮》就於日前（11月25日）於馬來西亞完滿結束。雖然《踩過界》一眾演員無緣其他大獎，不過就奪得了「最喜愛TVB劇集」。

《踩過界》中，飾演戴天恩的朱千雪接受《香港01》訪問時說：「好開心《踩過界》攞到「最佳劇集」。而佢暫時係我最後一部作品，我可以話俾人聽：『我最後一部劇係「最佳劇集」』yeah ! 係咪好勁吖？」朱千雪解釋道，「其實功勞都係每位演員嘅，因為每個角色佢哋都花咗好多心血同時間。仲有更加開心嘅係，正如思貝喺台上所講，呢一部劇係為弱勢社群發聲，對我嚟講參與到一部有意義嘅劇，係最大嘅喜悅。」

另一方面，臨近聖誕節。朱千雪就表示想放個假回加拿大探屋企人。而問到朱千雪會否順便帶醫生男友回加拿大「見家長」，朱千雪：「唔使啦，因為佢哋識咗好耐。佢媽咪同我媽咪好friend。我同佢係一齊玩到大，所以拍拖就冇嗰種『嘩』，好大件事嘅感覺。」

俗語都有話，「想留住男人嘅心，必先留住佢嘅胃」。問到朱千雪平時會不會「大顯身手」煮幾味時，她就說：「我廚藝麻麻地，但係佢廚藝就好好。以前一班朋友過聖誕佢都會煮火雞吖、意粉、威靈頓牛排咁。（Gordon Ramsay嗰隻？）Exactly！佢就用嗰個receipt。佢煮餸咁叻，所以都係負責食就得啦。」