舒淇宣布退出幕前﹗？出道22年拍過近百部電影，舒淇演技備受肯定，多次獲提名並奪得影后寶座。去年同馮德倫結婚後，雖然屢傳懷孕消息，舒淇每次都係笑住否認。佢喺5號晚上忽然留言寫上：「暫告演員生涯，承蒙錯愛⋯⋯⋯⋯各位，江湖再見」如果佢真係退出絕對係觀眾嘅損失。

喺華人影圈中，舒淇算係多產而又有票房保証嘅其中一人。最高峰時曾經喺1998年，拍攝《行運一條龍》、《風雲：雄霸天下》《古惑仔》系列等，一年拍足十套電影。佢喺12月5號晚上車愛貓嘅照片並留言話：「暫告演員生涯，承蒙錯愛⋯⋯⋯⋯各位，江湖再見。」據知佢剛剛完成同鹿晗合作嘅新戲《上海堡壘》，正係處於休息階段。

網友們對暫別一事議論紛紛，最多人估佢係成功懷孕想安心養胎，亦有人估計佢想跟隨老公馮德倫一樣，演而優則導。不過大家通通估錯晒，舒淇一覺瞓醒發現自己「被退出娛樂圈」，急急向傳媒澄清自己只係因為面部過敏一直無法完全康復，加上醫生警告不能一直拍戲，所以才打算休息一段時間，強調「是暫休，不是退休」。其實唔少藝人因為需要長期上妝，皮膚經常出現過敏，舒淇亦曾多次上載敏感紅腫照，希望今次休息可以令佢完全康復，之後再靚靚示人。