【虐狗？】鄭俊弘用釘帶教狗被圍攻 何雁詩撐：照教練建議使用
香港有唔少愛狗之人，每次有狗隻被遺棄或受虐嘅消息傳出，都會引起強烈反彈。鄭俊弘同何雁詩呢對小情人都係愛狗之人，不時上載愛犬嘅相片到社交網站。呢日有報道指鄭俊弘同舊愛分手後，二人所養嘅拉布拉多犬Riley歸Fred照顧，不過何雁詩耿耿於懷要求Fred棄養，同時被影到Fred用釘帶（Prong collar）放狗，有虐狗之嫌，引起公憤。
何雁詩本身都有養狗，佢嘅愛犬就比較細隻，同Fred拍拖後，亦曾被影到兩個人一齊放狗，看似相處融洽。報道指何雁詩同Fred同居後，Riley經常吠新嘅女主人，令二人不時為此爭執。仲話Fred為咗訓練Riley唔好再亂吠，幫佢帶上釘帶。報道一出唔少愛犬之人炮轟佢地有虐狗之嫌，何雁詩先喺13號早上留言話：「謠言止於智者，Riley好地地係屋企瞓緊，絕無棄養。每個人也有過去，私生活不應亦不會影響狗狗與主人的關係。其實我是狗癡⋯唔係好明發生咩事。」不過呢個回覆似乎更令網友憤怒，指責佢轉移視線。
而Fred亦喺IG上載Riley嘅相片，並以大篇幅英文留言回應呢件事，內容大致係：「養咗Riley已經4年幾，佢本身係一隻流浪狗，領養佢之後曾經有一次佢差啲被車撞到，所以我決定帶佢去接受訓練，訓練員建議我喺Training時使用釘帶，而呢款係好常見嘅訓練工具……」而何雁詩亦再寫咗一篇留言話：「我們按照教練的建議來使用Prong collar。它被用來防止傷害和保護其他狗的安全，我們已經被告知，如果使用正確，它不會造成任何顯著的疼痛或損害。作為4隻狗的主人，我被這個嚴重誤報的消息困惑不已，因為我從不放棄狗，我也有幾隻狗是收養的，我和Riley相處得非常好。」照佢地嘅講法，係專業狗隻訓練員叫佢使用釘帶，不過唔少養狗人士指，即使合法，明知會傷害到狗仔都唔應該使用。
到底使用釘帶訓練狗隻係咪咁常用呢？我地就呢件事向愛護動物協會查詢，佢地回覆指：「釘帶(Prong collar)就似普通狗頸圈，不過加上一啲經打磨嘅金屬製釘子，直接接觸狗狗頸部。每當狗狗搶繩時拉一拉，牠感到痛就唔再向前跑。我地協會係反對使用呢類釘帶同電帶去訓練狗隻，呢種頸圈有針會令到狗隻有不必要痛苦，因為頸部有血管淋巴等，狗隻愈痛其實愈掙扎愈易受傷，網上見到嗰啲造成血孔嘅傷痕，都真係會有機會造成，只要使用不當令狗隻受傷就有機會構成虐畜。」
其實市面上亦有好多狗帶可以做到同樣訓練目的。其實多倫多於本年初曾立例禁止狗主為狗隻配戴可以索緊的狗頸圈、頸繩、釘帶，雖然其後遭反對而暫緩禁令，不過呢種訓練狗隻嘅用具，的確具爭議性。