《公公出埠》似清談節目多過旅遊節目 兄弟情夠自然但係無笑位

撰文:張嘉敏
出版:更新:

之前晚晚發放笑彈的《Do姐再Shopping》於一片好評聲中圓滿落幕,農夫同Do姐呢個組合令觀眾非常受落,亦證明了將搞笑元素放入旅遊節目原來係好work的。而接棒播出的《公公出埠》,大家亦都期望節目中的4個主持:黎耀祥 (祥仔)、曹永廉(阿廉)、蕭正楠(Edwin)同黃浩然呢幾個老友可以擦出火花繼續為觀眾帶來歡樂,不過出來的效果卻並非預期中咁好笑,外間反應也似乎麻麻。

《Do姐去Shopping》個蜜瓜篇真係好好笑。

點解《Do姐再Shopping》咁好笑?主要原因當然是因為Do姐同農夫的C君、陸永好玩得埋,真係可以玩到癲晒,Do姐點串農夫兩人都不會嬲豬,兩人又甘願做下把位,3個走埋一齊自然會一唱一和玩得好開心。而農夫講嘢又夠貼地,知道時下的人鍾意聽咩,他們轉數又快,搞gag可謂無難度。

真係玩得好癲。

相反,《公公出埠》節目中的祥仔、阿廉、Edwin同黃浩然私底下雖然friend,但在鏡頭前就無一種真係好玩得埋的感覺,加上4個人都比較木獨,講嘢亦無咩喜感同幽默感,難以令人覺得搞笑,好多時他們講嘅嘢只得他們自己識笑,觀眾未必會有共鳴。他們4個在節目中傾偈時甚至會出現dead air的情況,有些gag亦似跟稿讀咁。阿廉平時講嘢明明好好笑,但今次在節目中卻發揮不了。其實全男班的旅遊節目真係不太吸引,之前《4個小生去旅行》雖然都係幾個阿叔,不過起碼有鬧交場面,有火花先會好睇。

4個好笑嘅一面似乎無好好發揮到。

未知是否剪接的問題令到《公公出埠》唔好笑,例如第3集有一幕是阿廉話:「我唔鍾意去旅行,因為我無咩記性。」正當觀眾想知他此話何解等他講落去時,呢一幕就完咗了。睇完真係無言,咁究竟他想表達些甚麼?完全唔知個笑位在哪。如果自問笑點極低的不妨挑戰一下。

傾偈有時會出現dead air。
反而想睇佢哋鏡頭外係咁相處。