【兵仔講兵法】劇集質素影響兩性生活 陪睇《溏心3》係精神家暴

撰文:
最後更新日期:

免費電視台今時今日話就話有三個台,問心講句,最多人睇的仍是無綫劇集,同時亦有不少觀眾邊睇邊鬧,離不開「劇情離地」、「橋段老土」,結局千篇一律無新意之類,總結一句就係「膠到無朋友」。當然有人會話網上世界大把選擇,要煲劇「中美日韓」鍾意睇乜劇都得,無綫膠劇關我乜事?就係呢個天真諗法,令你同另一半,包括老婆、女友、仍在追求中的女神關係改變,變好就無所謂,但係通常都係變差呢?無綫膠劇的威力確是唔講得笑。

夏雨同李司棋不斷講潮語,都無辦法為《溏心風暴3》挽救收視。(劇照)

煲劇都係諗住放工消閒娛樂,點解會影響男女感情呢?老實講男男女女的拍拖娛樂,都係離不開行街睇戲食飯,但係行得多都會腳軟啦,都要留在屋企Sweet一下,問題就出來啦,成晚流流長,總會開電視睇下,但由7點檔播大陸劇,之後柴娃娃的《開心速遞》,到睇少一集都唔知講乜的《誇世代》,仲玩緊10年前爭產,追唔上時代的《溏心風暴3》,叫大家仲點可以乖乖煲劇,最後結果就係一人一部iPad,女仔追韓劇,男仔打機,仲要隨時戴埋耳筒,身處同一屋簷下,卻變成兩個世界。

《溏心3》唐文龍和陳敏之的不倫戀,會令女人狂鬧,男人無言。(劇照)

還記得之前播《降魔的》,真係有不少男女一齊睇,就算出了街,或者仍在Dating階段的男女,之後返屋企都會各自睇返MytvSuper,都叫做有共同話題,估下石敢當係咪豪仔,蔣志光一人分飾四角的搞笑,啤啤、龍貓慘死都會戥他們可憐,連馬國明咁好戲都無視帝,繼續做炮灰都可以講一餐。家陣論到接住播出的《溏心3》,夏雨、司棋姐講潮語,真係好難令人有共鳴,全劇最搶的小三角色陳敏之,也只是大灑盬花,搏得女性觀眾大鬧特鬧,但劇情其實一早估到,冇乜驚喜。最攞命是植入式廣告,無啦啦會沖奶茶,夏雨鬧完唐文龍又要潑奶茶,誇張得來得啖笑,最後結果又係熄電視,更加唔會同另一半講下劇情。

《降魔的》相當好睇,只能講句TVB欠馬國明一個視帝。(劇照)

馬國明、金剛、小儀的親情戲分,男女觀眾都睇到眼濕濕。(劇照)

退一萬步講,當大家女友或者老婆,好鍾意睇《溏心風暴3》(無得解釋),作為一個男仔,如何可以說服自己去陪女友(或老婆)一齊追劇呢?就算一齊係電視機前,都只不過得個肉體,靈魂早已唔知飛到那裡。甚至另一半在追劇時,你都只係會做其他事情(打機、玩電話),一句到尾又係因為一部膠劇,令彼此貌合神離,活於各自的空間,如果女友仲唔醒目逼你睇,真係比死更難受。一齣好的劇集,正是可以男女觀眾通殺,等於之前《不懂撒嬌的女人》,女仔會讚王浩信深情,肉緊他跟唐詩詠的戀情婚事,男仔就更簡單,一味睇女都已經回味無窮。

蔣志光飾演的有為,令觀眾對他讚不絕口,不捨得讓他死。(劇照)

龍貓何遠東慘死,又是一個催淚位,最啱同女神女友或者老婆一齊睇。(劇照)

最後一樣對男仔最大最直接的影響,就是拍拖的使費,一套值得大家拍住拖去睇嘅電影,200元戲票無走雞,再加食飯飲嘢直落,隨時出次街要7、8百元埋單,好唔化算。反觀如果有一套讓人欲罷不能,要追看的電視劇,縮骨啲講句真係慳返唔少,但無綫播緊的三線劇集,《溏心風暴3》肯定留不住觀眾,睇返每況愈下的收視就知,所以無綫不停播出膠戲,唔係唔關大家事,更加影響到一段男女關係,如果大家有日Touch wood同另一半分手,或者追求女神失敗,TVB都要負返啲責任。

《不懂撒嬌的女人》都算係神劇,最適合戀愛中的情侶浪漫煲劇。(劇照)

男觀眾煲劇睇女仔已經好開心,仲可以係女友面前光明正大咁睇。(劇照)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。