徐榮享受男人的浪漫　同成班佬去電單車旅行：好free，好正！

徐榮一向都鍾意揸電單車，早前他就到了馬來西亞與一班朋友進行了一次電單車旅行，玩了10日，令他覺得又正又free呀！講返今次呢個旅行，原來都籌備了好耐時間，他說：「喺我拍《大帥哥》嗰時已經開始籌備，都籌備咗有兩個半月。今次同我一齊旅行嘅呢班兄弟係馬來西亞Harley會嘅會員，呢個會嘅領導人物係我親戚，我同一位香港朋友一齊去join佢哋。佢哋好好，借咗兩部Harly Davidson畀我哋揸。我哋由吉隆坡揸去雲頂，再去檳、城怡保，之後再返吉隆坡，總共揸咗成千幾公里。沿途就食下啲美食，又周圍觀光下，成個旅程都好開心。」今次完全係男人的浪漫呀！

不過要去10日電單車旅行，徐榮的老婆又有否不想他去呢？他說：「又唔會話唔畀我去，要傾囉，唔好去咁多日。原本諗住去兩個星期，結果都係10日好啦，返嚟要湊仔湊女。」而這次其實已是他的第二次電單車旅行，第一次是3年前去日本：「我細細個已經好想做呢樣嘢，到咗2014年拍緊《愛‧回家》，嗰時特登同劇組請咗兩星期假去嘅。日本嗰時舒服好多，一日揸百零公里，而喺馬來西亞一日最遠就揸咗成400幾公里，揸到手痳痺，塊面都痺，呢次raw好多，成件事好麻甩。」

究竟電單車旅行對徐榮來說有甚麼咁吸引呢？他說：「揸電單車嘅感覺好free，好舒服，同埋揸住架車穿州過省，有種歷險嘅感覺，亦可以將所有煩嘢都放低晒。」至於去一趟電單車旅行的開支要幾多，他就謂剛剛去馬來西亞這次不可以作準：「因為呢次我哋唔使畀租車錢，上次去日本就用咗港幣一萬蚊多啲，喺當地租車港幣400幾蚊一日，酒店就400幾蚊一晚，連埋機票使費就萬幾蚊。」去旅行總會令人去上癮，所以他應該都會有第三次：「老婆實俾嘅，唔好咁密，過多一排先囉。」