依家去睇演唱會一啲都唔平，動輒幾百一千甚至二千蚊睇一場兩個幾鐘嘅演出，如果有Encore唱多幾首，歌迷感覺上都開心啲，好似賺咗呀嗎。超時演出歌手同製作單位就要被罰錢，呢啲新聞都不時出現，不過原來唱少咗，都一樣會被罰，梁詠琪同趙雷就係因為咁，而被北京當局罰款5萬元人民幣﹗令大家驚覺，乜原來唱少咗都要罰架咩？

北京市文化市場行政執法總隊，發佈2017年下半年《文化市場8起典型案件》，當中有兩單演唱會都犯例被罰，其中GIGI梁詠琪喺2017年8月5日，於北京五棵松體育館舉行演唱會，執法人員發現舉辦方並未在演出前明示演出最低時長、最低曲目數量，判罰5萬元人民幣。而趙雷亦因為申報演唱曲目40首，而現場演出中只唱27首，同樣被罰5萬元人民幣。成為首批因為未公開演出最低曲目而被罰嘅案例。網友對此議論紛紛，作為消費者俾完錢收唔足貨，當然贊成官方執法，不過歌迷就覺得如果唱多唱少都要罰，睇嚟以後應該要搵專人喺台前計住先得啦。