【母愛氾濫】余文樂飛土耳其工作 樂嫂王棠云學湊B自得其樂
撰文：洪曉璇
出版：更新：
下個月就係農曆新年，大家準備好俾姨媽姑姐問候未呢？「拍拖未呀？」、「拍拖咁耐幾時結婚呀？」、「婚都結埋囉幾時生BB呀？」、「BB都咁大個幾時追多個？」，新年必備嘅幾句問候大家應該相當熟悉。余文樂12月正式同台灣皮帶大王千金王棠云結婚，最近喺香港入紙註冊，已經多次傳出樂嫂懷孕消息，呢日王棠云上載一條同BB玩嘅短片，母愛氾濫呀。
婚後余文樂不停放兩公婆合照，被封為「曬妻狂魔」。(余文樂IG)
余文樂出道以來都不願多提感情事，至婚後開始性情大變多次放閃，同太太自拍分享到社交網站。樂嫂反而就低調得多，婚後只分享過一張佢地著禮服嘅背影照外，就再無見過樂仔蹤影啦。呢日王棠云仲公然抱住另一個人，短片中一開始見到佢手抱幾個月大喊緊嘅BB，王棠云個樣顯得有點手足無措，當BB收聲之後佢都鬆一口氣仲即時送吻添。其實咁鍾意小朋友真係可以學定點湊BB先啦。
老公唔喺身邊，樂嫂連日同朋友見面聚會，仲拎人地個BB嚟玩，不如快啲生返個啦。(影片截圖)
至於樂仔最近就重新投入工作，飛到去土耳其，聯同林志穎、胡一天、林允等拍攝新節目《二十四小時》，呢個組合嘅大合照一公開，馬上引起網友討論：「天啊，我的男神都在裏面」，「都是帥哥美女啊」。余文樂亦留言話：「新的朋友們，新的任務，新的嘗試。」
余文樂孖住林志穎胡一天等，到土耳其拍攝真人騷。(余文樂IG)