「論武功～俗世中不知邊個高～」睇開武俠古裝劇，少不免打鬥場面喇。不過呢，打交嘅下場就係會元氣大傷，運功療傷就係其次最多嘅畫面喇。運功嘅指定動作，就梗係伸出雙手，將隻手掌推落療傷者個背脊度。之但係，有好多人都會突破盲點，思考下點解男人幫女人運功，女方要唔著衫；但男人幫男人運功，就原封不動？

講到最經典嘅運功場面，大家都會口徑一致話係《神鵰俠侶》入面楊過同小龍女嘅「玉女心經」喇。入面有幾多招就唔在講喇，但係就可以解釋到點解佢哋兩個人要唔著衫。原著喺呢一幕就話：

小龍女道：「這經上說，練功時全身熱氣蒸騰，須揀空曠無人之處，全身衣服暢開而修習，使得熱氣立時發散，無片刻阻滯，否則轉而鬱積體內，小則重病，大則喪身。」楊過道：「那麽咱們解開衣服修習就是了。」

呢到咁清楚講明唔除衫就會死，於是所有《神鵰俠侶》系列演繹呢一幕就「光明正大、順理成章」地，兩人寬衣解帶，再練功。觀眾睇時都唔會有犯駁位。

之但係，有網民就回帶過去TVB翻拍金庸嘅劇集，特別引出《倚天屠龍記》入面，吳啟華幫黎姿同佘詩曼運功療傷，女方都唔著衫，但係佢喺光明頂之戰呢，幫殷天正同宗維俠療傷，兩位反而唔使除衫喎！呢個諗法好易令人想入非非㗎嘛！但根據原文，佢描寫到張無忌為周芷若療傷而糾結時，寫到：

「張無忌運神功替謝遜驅去了體內毒性后，本該替周芷若驅毒，但想這驅毒之法須以一掌貼於對方后腰，一掌貼於臍上小腹，青年男女，怎能如此肌膚相親？但若非這般運功，又不能將自身的九陽真氣輸入她體內，一連數日，心下好生躊躇，難以決斷。」

上文講到「肌膚之親」其實充滿灰色地帶。對於咁保守古代嘅，不論男女著唔著衫，只要掂到對方，好似都會禁忌咁，所以張無忌思前想後嘅地方，有機會唔在於要唔要除衫，而係著衫時掂到對方比較私密嘅部位會唔好意思。咁樣解讀嘅話，周芷若係可以著衫㗎！所以，如果要解讀TVB咁做，係為咗畫面好睇喇！

網民對「運功」有不少迷思，《香港01》就找到前無綫資料搜集員蒲鋒，為大家解說下，他說：「首先運功、傳功全部都係假㗎啦，本身都係虛構，現實中係冇呢樣嘢，佢係武俠小說作者創作出嚟，作者佢哋想點就點，但以金庸小說嚟計，運功係唔駛除衫，但係玉女心經嗰種功夫呢，小龍女練最高層次嗰時，大家除哂衫喺花裏面嗰度練，但其實呢個係金庸係某場戲set嘅一個情節嚟啫，佢唔係所有功夫都係咁，所以係冇犯駁呢個說法，但我相信大家都係講下笑娛樂下㗎啫。」