早前首次接拍內地相親真人騷《愛的時差》，由商界轉戰娛樂圈的薛世恒（Daniel）後，最近再獻出了人生第一次，就是為美容護膚中心拍攝「處男」廣告。在拍攝廣告當日，Daniel 換上多套由設計師 Arthur Lam 的禮服，並應導演要求連環「Chok 樣」及即場跳舞，他笑說：「第一次拍廣告好享受過程，因為導演要我表達『暖男』嘅感覺，代入咗感覺後，發現原來自己都有呢一面。同埋好多時要 Chok 表情，估唔到自己都 Chok 到喎。」

首次拍攝大型廣告的Daniel，事前難免會有緊張， 坦言為今次廣告做足準備：「前一晚有少少瞓唔著，過去幾星期都會不斷做 Gym 同跑步，減磅練返線條出嚟，另外都有刻意去練習望鏡頭嘅眼神同埋講嘢嘅節奏。」不過拍攝時女模表現稍為緊張，Daniel 反過來安慰她令對方放鬆心情，他說：「佢可能集慣影硬照，唔慣拍廣告，我有同佢講試下感覺我哋係一對情侶，投入返個感情。我都有諗如果呢個係我女朋友，所以會輕輕摸下佢。」

Daniel 坦言接拍《愛的時差》後，令他更放膽追女仔：「呢個節目令我放低咗自我，放膽去追女仔，但依家節目完咗要收拾心情，因為現實世界唔可以咁輕易投放咁多感情去鍾意一個女仔，可能隨時會受傷。」另外，陳敏之得知好友拍攝廣告，特意送上自家曲奇「Blesscuit」為Daniel 打氣，更在心意卡寫上「第一次！加油！」，非常窩心。而 Daniel 更即場分甘同味，派發敏之的愛心曲奇慰勞現場一班工作人員。