【心碎了】彭于晏戀情曝光？ 被長髮少女從後環抱照遭瘋傳
撰文：洪曉璇
出版：更新：
到底一男一女咩關係會從後環抱一齊合照？父女？兄妹？夫婦？總而言之點睇都唔會係相信普通朋友嘅合照尺度。男神彭于晏感情生活一向備受關注，多年來從未公開承認拍拖，呢日微博忽然瘋傳兩張佢同長髮少女嘅合照，唔通見到老友余文樂結婚後，令到Eddie都想公開戀情定落嚟？
近年彭于晏於影壇發展相當順暢，片約一部接一部，不過就好似忙到無時間拍拖。雖然歷年來同蔡依林、張鈞甯到舒淇都傳過緋聞，但Eddie就一直無認過拍拖。上年10月仲忽然傳出佢同內地富商張磊過從甚密，嚇到大家個心離一離。呢日Eddie又上咗微博熱搜榜，仲有合照流出添呀。
呢兩張相係照片中女子上載到自己IG繼而流出，第一張相係個女仔揸機自拍，Eddie面上眼鏡滑落至鼻尖相當攪鬼，就咁睇呢張相其實真係無乜嘢，問題出自第二張照片。呢張相中長髮少女居然從後環抱Eddie笑得相當開懷，仲留言寫上：「生命已完整。」令萬千粉絲心碎聲不絕。據知呢個女仔係一名空姐，雖然佢其後留言話：「請大家別激動，人家只是于晏的粉粉，哈哈哈哈哈哈爽。」不過有網友質疑點解佢無著空姐制服，拍攝背景亦唔似喺機艙或者候機室，對偶像到底係咪公開戀情仍舊抱住質疑觀望態度。