陳冠希代表中國參與紐約時裝周 司機兼助手龍哥意外成亮點
撰文：李妍樺
出版：更新：
尋日（9/2）余文樂自家潮牌官網物流說明個Page誤將「港、澳、台」歸類做國家，觸動大陸網民情緒，話要罷買仲叫佢「滾出中國」，余文樂即刻漏夜喺微博道歉，但依然未平息到民憤，睇嚟佢以後喺大陸都好難接到Job。
喺同一日原來陳冠希參與紐約時裝週，Sell中國風，仲特登整咗件T恤心口寫住「華人」兩個字，食中大陸人鍾意威嘅心態，粉絲們個個興奮大讚：「陈冠希是我们中国人的骄傲！」
個人認係龍哥係陳冠希成個時裝展嘅最大亮點。（網上圖片）
大陸人形容陳冠希係中國人的驕傲。（網上圖片）
今日陳冠希在天貓上推出心口寫上「華人」兩字的T恤。（網上圖片）
其實龍門真係任擺，其實陳冠希係加拿大人，但佢拎香港身份證喺香港出道，因為淫照事件就返咗大陸撈，究竟係邊度嘅驕傲呢，That's a good question！
陳冠希紐約時裝展照片（點撃下圖）
+7
左：CLOT，右：李寧。（網上圖片）
不過咁，大家都可以用欣賞嘅角度去睇呢件事，雖然有媒體會形容係「香港時裝歷史性一頁」，但其實阿冠希哥係以中國嘅名義「Made in China」參與嘅，而且同場仲有中國運動品牌「李寧」，Fashion嘅嘢唔知大家識唔識，但將陳冠希嘅CLOT同傳統李寧比，真心CLOT就真係唔太識欣賞，而李寧就反而令人眼前一亮。
李寧紐時裝展（點撃下圖）
+4
不過睇時裝展又唔一定淨係睇衫嘅，陳冠希搵嚟一班明星朋友幫佢做Model，好似有MC仁、Dr Woo、Cali Thornhill Dewitt咁，而壓軸就係佢個司機兼助理「龍哥」喇，唔知大家有冇印象，好耐之前有張改圖係將陳冠希同龍哥個頭互Key完住冇違和感，喺時裝周都帶埋龍哥行Catwalk，證明龍哥對陳冠希好重要，佢自己都講過龍哥就好似佢第二個爸爸咁重要。