【流晒口水】林雪原來係隱世廚神 招牌菜Celine食到舐舐脷
撰文：洪曉璇
出版：更新：
林雪龐大身型Man爆外表，著上圍裙原來都好合襯噃。
年三十除夕夜，家家戶戶都要食團年飯，開開心心過年，屋企食飯通常都係媽媽下廚大展身手，估唔到男人味極重嘅林雪，原來廚藝都相當了得，有道獨門招牌菜「雪式紅燒肉」，經常喺片場煮俾台前幕後品嘗。林雪笑言：「一煮就煮幾十斤﹗第日邊個導演搵我拍戲，我煮紅燒肉你食好冇？」
同公司嘅林雪同譚芷昀（Celine）一齊去買餸煮團年飯，Celine仲幫手講價。
同一經理人公司嘅林雪同譚芷昀（Celine），作為公司家族磅數最重同最輕、年紀最大同最細嘅成員，早兩日一齊去街市買賀年餸，並由林雪親自落廚，親手煮獨門招牌菜「雪式紅燒肉」，一齊食團年飯。Celine跟住林雪去街市買餸，唔好睇佢人仔細細，原來講價都相當利害，買豬肉都成功平到100蚊，Celine 話：「我有試過同媽咪去街市買餸，會幫媽咪買好多嘢。呢個紅燒肉我買咗豬肉、蔥、薑同蒜頭，原本買咗三百幾，後尾二百四十蚊就得啦。」
原來平時Celine都有跟媽媽去買餸，仲識幫手拎野好乖女呀。
重頭戲當然係林雪廚房，估唔到林雪下廚非常了得，火喉到、 調味準確，其獨門秘方係蒜蔥炮製的醬汁，令整道菜色香味俱全。「雪式紅燒肉」成為林雪招牌菜原來有段故：「我細個好鍾意食肉，見到隔離整紅燒肉就流口水， 成日俾屋企人話我為食，我自細有個願望，等我大個咗搵到食，一定日日煮紅燒肉。到我大個搵咗第一嚿錢就買咗嚿豬肉，返去研究紅燒肉，我搵第一次錢係15歲，今年我 50 幾歲，你諗吓我做紅燒肉做咗幾耐，所以我呢個紅燒肉係幾拿手。」
林雪下廚煮招牌菜「雪式紅燒肉」，表現拋鑊相當有功架。
雖然觀眾唔知林雪好煮得，但喺香港影壇原來已經係公開嘅秘密，事關林雪不時都喺片場做埋伙頭工：「喺國內拍戲天寒地凍，有時飯盒嚟咗又未必即刻有得食，所以我有喺現場煮好多紅燒肉俾大家食，一煮就煮幾十斤。我試過一次，家英哥佢有糖尿嘅，從來唔食肉同埋唔食甜嘢，但佢食完之後返轉頭問我攞多幾嚿，所以第日邊個導演搵我拍戲，我煮紅燒肉你食好冇？」
林雪廚藝真係相當勁，Celine食到唔停口，成碗白飯被吃到碗底朝天。
+6