G.E.M.鄧紫棋昨晚於澳門舉行《Queen of Hearts 世界巡迴演唱會》澳門站，適逢昨日大年初九，G.E.M.好識做向在場 8,000 名粉絲拜年，派發「幸運利是」人人有份。大家最關心當然係利是銀碼啦。其實利是都係心意心意啫，內有演唱會紀念品換領券，以及三封「特獎」有後台通行證，讓幸運兒與G.E.M.近距離接觸。

G.E.M. 當年舉行首個澳門個唱時，才剛滿18歲，依家26歲，時間過得好快。佢話：「記得第一次喺澳門開演唱會係18歲，當時個場地雖然唔大，但已經好開心，因為畢竟好難得可以離開香港開騷。仲記得當時啱啱成年，我終於可以入賭場，好開心！依家我26歲喇，今晚點都要入多次賭場。」G.E.M. 全晚唱足多首經典歌曲，更兩度Encore掀起高潮！而在最後的自彈自唱環節，G.E.M.更順應民意在巡唱上唱出《失真》：「我之前喺有問過大家想聽我唱邊首歌，我發現好多朋友都留言同一首歌，我好重視你哋嘅意見，所以今晚特別為你哋準備呢首你哋揀嘅歌。」