《天與地》金句你記得幾多？　「city is dying」好永恆

《天與地》被喻為神劇都唔係無原因，當年劇中有好多對白都是反映香港社會現實，諷刺時弊，而獲得不少觀眾的認同。就好似飾演Dr. Dylan的Joe Junior，他就在劇中曾講過，「過去嘅事係攞嚟回味，唔應該攞黎逃避。」其實這一句不止用於當年的情況，其實現在亦十分適用，大家仲記得有幾多金句呢？

你睇吓我哋呢個世界，睇吓我哋呢個城市係乜嘢樣，除咗錢呢個字之外，我哋已經分辨唔出是非黑白，我哋每個人都被環境訓練到，好似倒模出嚟噉。鍾意食同一樣嘅嘢、鍾意同一樣電視節目、支持同一種政治立場，信奉同一種生老病死嘅做人方法，this city is dying, you know?

相關文章：《天與地》戚其義召喚陳豪佘詩曼　黃德斌認再合體：係有份演

無論係香港定係世界任何一個地方，政治世界就係污糟邋遢嘅世界，從政手段就只有卑鄙、奸詐，除咗呢樣，就只有更卑鄙、更奸詐。大家如果想得到公義嘅話，我可以話比大家聽，一個公義嘅人，絕對，亦冇可能幫你哋達到目的。你哋唔好再自己呃自己，你哋只可以靠一啲自私嘅人，當嗰啲自私嘅人得到佢得到嘅嘢，佢滿足咗之後，佢先會企出嚟為你哋爭取你哋所想。呢個世界就係咁醜惡，我哋要面對現實，我哋先至可以行我哋嘅路。大家企出嚟睇吓我哋嘅世界，呢個就係我哋嘅世界，呢個就係我哋嘅選擇。

當所有人都話我哋嘅城市被邊緣化之後，我哋會覺得沮喪、失望、悲哀，但我哋從來都冇去諗，所謂嘅邊緣化，係因為我哋依附係一個主流嘅價值觀入面。

冇錯，大家而家聽到嘅嘭嘭聲，就係強權同制度下嘅代表，響建制下嘅當權者。佢哋最恐懼嘅就係佢哋管治嘅人唔聽話。但係外面嘅人有自己嘅諗法，有自己嘅主張；但係rock & roll嘅精神，就係講獨立嘅精神。我哋每一個人都係自己嘅主人，我哋每一個人都有權主宰自己嘅路嚟行㗎！雖然今晚呢個show可能係非法進行，但係我哋唔會就咁屈服。Rock & roll never die！Rock & roll never die！