提起皮褲大家一定諗起「時裝災難」嘅皮褲G.E.M.（鄧紫棋），可能因為佢的大腿比較粗壯，皮褲就將佢嘅大腿肌肉線條表露無遺。早前G.E.M.同男友喺日本比人偷拍，大家就將重點落喺佢條貼身牛仔褲趁對Yeezy Boost 350 V2，顯得比例好差，對腳好粗，事後佢自己都承認：「我都知我自己腿粗，但呢張相影到我比現實粗好多倍呀！」唔通腳粗唔可以著皮褲，係禁忌？

非也，其實識得著，皮褲人人都Carry得到。

前排台灣歌手張韶涵因為拍大陸個節目《歌手》（即係阿漿之前爆紅嗰個騷），把聲好聽當然就梗啦，但除咗歌聲之外觀眾仲大讚佢著衫好睇，係「行走的衣架」！本身張韶涵就好有仙女Feel，出騷通常都係著薄紗長裙，成個小龍女咁，有一集張韶涵轉Tone著咗條皮褲，個個都狂讚，直程叫佢做皮褲代言人。雖則張韶涵因為先天因素，係紙板人，高158cm連90磅都冇，但瘦唔係一定著皮褲著得靚，全靠佢配搭得宜。

三招著皮褲唔顯腳粗

1. 長褸襯皮褲

本身對腳唔夠幼，著皮褲其實就會比較現腿形，所以大髀最好就遮一遮，著長褸就可以修飾到Hip位之餘，仲可以遮大腿，一流啊！

2. 有顯瘦設計皮褲

而張韶涵本身已經著咗件長毛就係用咗呢招，雖然本身條腿已經好幼，但佢都揀咗條大腿位有束繩設計，可以轉移大家嘅視線，就不會留意到隻腳到底係粗定幼，相當Work！

3. 皮草搭皮褲

呢個直程係明星秋冬季嘅必殺招，上身著淨色衫，外面加件皮草，再配皮褲，行出街完全係Super star，皮草絕對令你霸氣大增，成為全場嘅焦點！