陳國坤爆乖仔陳真調皮大膽 滑雪炒車都唔驚
撰文：冼燕珊
出版：更新：
陳國坤同黃伊汶（Emme)仔仔陳真，雖然得兩歲人仔，但受歡迎程度不亞於爸爸媽媽，陳國坤今日出席網劇«拳道»發布會，講起陳真都大讚自己個仔可愛。
不過陳國坤話陳真除咗大家見到可愛嘅一面，其實仲有不為人知嘅一面:「我覺得佢好調皮，可能畀我寵壞，好鬼馬。」陳國坤話陳真鬼馬，但其實係遺傳自佢，除咗鬼馬調皮一面，仲有大膽嘅冒險精神都似陳國坤:「剛剛同佢去日本滑雪，滑落小斜坡，佢滑到炒晒車，成個人飛出嚟，趴喺雪地唔郁，我過去抱佢起身，問佢仲玩唔玩，佢話要再玩，第二次炒得仲勁啲。」
陳國坤今日出席網劇«拳道»發佈會，講起陳真都忍唔住讚自己個仔得意。（黃國立攝）
陳國坤話仔仔調皮鬼馬，仲非常大膽，似足佢。（黃國立攝）
陳國坤話唔抗拒仔仔玩啲危險嘢，要畀佢嘗試多啲，難怪陳真咁大膽，受傷都唔怕，似足老竇。不過陳國坤就話自己唔係嚴父，同埋可能仔仔少見爸爸，陳國坤如果喺屋企，陳真就會勁痴佢:「可能我無阿媽咁多時間喺屋企，佢好珍惜同我一齊嘅時間，如果我全日喺堅企，佢嗰日最少嗌一千次爸爸，冧死人。」
陳國坤比較少喺屋企，反而令仔仔更珍惜同佢一齊嘅時間。（黃國立攝）
陳國坤講起仔仔，成個人一臉慈父樣，問到會唔會追多個，佢即刻話:「梗係會啦，咁得意!」不過佢都話要計劃吓，始終湊小朋友好大責任，佢大讚老婆Emme好偉大:「做媽咪係好辛苦，終於明白母愛好偉大，無論時間、精神同體力都畀晒個小朋友。」
陳國坤與他兒子。（網上圖片）
陳國坤與他兒子一樣帥氣。（網上圖片）
陳國坤揚言話要追多個，仲大讚老婆黃伊汶好偉大。（黃國立攝）