40吋爆肌照睇到網民「流晒口水」 羅仲謙得天獨厚:我食乜都得

撰文:
最後更新日期:

羅仲謙近年主攻中國內地市場,除了新年檔期有份上映的《西遊記.女兒國》之外,更有電視上播映的劇集《無間道》。羅仲謙接受《香港01》訪問時表示,稍後5月中左右到內地參與一部古裝電影的拍攝工作。不過近日最令網民關注的,莫過於是羅仲謙於Instagram上張貼的一張做gym相。驟眼睇胸肌真係起碼有成40吋,真係睇到班粉絲個個熱血沸騰,問到羅仲謙操肌成績時,佢就話:「秘密。」

羅仲謙呢張相睇到唔少網民嘩嘩聲。(Instagram圖片)

今日(3月11日)羅仲謙出席慈善活動,接受《香港01》訪問時就講到自己每日都會堅持做gym。「盡量每一日一次,但係嗰一個鐘頭要好專心,連電話都要鎖落locker。(做gym係主要練乜?)每一日都唔同,會操大腿肌肉、膊頭、背脊,胸部、二頭肌、三頭肌。多數都係呢6㨾,6樣循環咁做,一日一樣。」

羅仲謙自言操肌期間好專心,乜電話都唔聽。(陳順禎攝)

羅仲謙也分享了其中練二頭肌的細節。「其實二頭肌好多時都會用到,但係二頭肌肌肉有分內同外,同埋夠唔夠長,所以變咗有人會練得唔夠立體。練嘅方法由低去到中間,定中間去到上面,或者坐喺度玩定趴喺度玩,效果都唔一樣。我通常都係用機械(負重)去訓練。我練手瓜通常都係練6-7組動作,每組動作大概係10-15下,1個鍾一個動作做3組左右。」

當年無綫劇集《飛虎》謙仔肌肉係賣點,那時視帝王浩信為男二。

保持完美身形,好多時都需要飲食配合。有些需要急速練大隻的藝人可能需要日食卅隻雞蛋,又或者戒食澱粉質之類。羅仲謙自言自己就沒有這個規定,幾乎係「食乜都得」。羅仲謙説:「我冇刻意去戒食,不過主要就係肥嘅嘢唔食,但係我乜嘢都食。因為我自己體質係需要多啲蛋白,肌肉先會發達。我平時都會食好多飯或者粉麵。教練仲話我可以任食,因為消耗得多,如果唔係會進步太少。」

不過飲食方面,羅仲謙就話自己乜都可以食,真係好令人羨慕。

羅仲謙自言,健身需要掌握基本工,自己並没有刻意去「練大隻」。反而他追求的是身形健碩之餘又「firm」。「做gym如果急嘅話,未必係好事。其實我睇返我以前啲相,我覺得唔靚。我宜家跟咗個新教練可以幫我操到理想身形,大約半年時間。不過宜家仲未達到我理想中嘅身形,我諗仲要年半時間左右。」

真係睇到嘩嘩聲。(Instagram圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。