【果欄中的江湖大嫂】黃建東鋼條變210磅肥佬：真係驚咗自己

無綫劇《果欄中的江湖大嫂》除咗有黃浩然、林子善等吸睛爆肌大隻仔，都有好多身形貼地好多嘅「欄佬」，等成件事唔好太離地、太「幻想世界」。當中最突出嘅可能係之前拍過好多惹笑短片、憑惡搞《PPAP》彈起嘅黃建東（Derek）。點解咁講？因為佢嘅大肚腩同埋肥仔波實在太出，每逢亮相都唔小心都望多兩眼。

睇到佢依家咁樣，其實真係好難想像到36歲嘅佢曾經好弗，2011年參加香港先生選舉時甚至可以話係鋼條身形。現時重達210磅、腰圍達38吋的Derek受訪時就話依家頂唔順自己變成咁：「依家真係人生最肥嘅時候，所以我直頭係唔敢睇《果欄》，真係驚咗自己。完全冇諗過以前入行著中碼嘅自己，依家要著加大碼。」

問點解會搞到今時今日咁嘅境地？Derek話：「一來我本身係肥仔底，當年我為咗參加香港先生先減咗三十磅；二來見到大家對《PPAP》咁受落，就諗我係咪肥嘟嘟會得意啲，因為之前啲人話我個樣好惡，但原來我係做唔到阿Bob（林盛斌）或者何遠東嘅感覺。」

Derek坦言曾一度以為自己患暴食症，最後靠意志力克服：「上年對前路啲迷茫，要不停依賴食物去減壓，係完全停唔到，食完嘢都Keep住食，到凌晨又食，借食去逃避現實，之後就覺得唔可以咁。」

Derek話自己依家開始會減肥，唔想繼續自暴自棄：「最近開始同楊明跑步，之後都會節食同打泰拳。（唔食減肥藥？）依家年紀大咗，唔想靠藥物，睇得太多食藥猝死嘅個案。網上睇到陳奐仁個大改變，覺得真係好勵志，冇嘢係冇可能，我會努力。」

佢以前係咁：

大家都唔想佢繼續咁唔健康：