張敬軒演唱會再現絕望座位表　只剩兩成大側角位有得買

被稱為「神」嘅黃子華開最後一次棟篤笑，當然係人都想現場睇啦，可惜呢個世界有「黃牛」呢回事，激到子華神開LIVE痛斥。

不過就算呢個世界無黃牛搶飛，亦都會有主辦商優先取得門票，只餘下一部份留待公開發售，就好似《張敬軒降兩度演唱會2018》咁，6月15日至17日共3場嘅演唱會今日開始公開發售，不過從該座位表可見，供購買嘅只剩餘兩成左右，且絕大部份屬於山頂位。難得有少少係接近舞台嘅，但都只能夠睇住軒仔嘅後尾枕。

【金盆𠺘口】黃子華寧願吉位唔益黃牛 4月24公開發售每人限買4張

咁另外嗰八成、油黑晒嘅座位去咗邊呀？咩人先買到嗰啲飛呀？斷估就係預留俾眾多贊助商，最起碼建行信用卡持有人可優先訂票，預先買走一啲靚位。

有啲網民心水好清呀，一早睇穿呢個開show嘅常態：「常態咗好耐啦，上網一見座位表就爆粗。」「我寧願贊同商自己賣飛派飛，好過浪費咁多F5制同大家嘅時間。」

照呢個做法去推斷埋黃子華嘅棟篤笑，雖則公開發售嘅座位表仲未出，但一樣有贊助商，一樣有信用卡持有人優先訂購，會唔會又係無咩位留俾公開發售架？如果堅係咁，難怪《金盆𠺘口》琴日優先預訂一開始，黃牛飛就已經炒高10幾倍啦！唔信？有圖有真相，網上面已經明碼實價標明A Reserve要$15,555喇。

其實建議唔搞公開發售可能仲好，收埋私人開party或者仲開心，因為賣嗰少少飛但搞到滿城風雨，同派嗰少少錢但多多條件兼行政費隨時使得仲多一樣意義不大。