【冒險王衛斯理】王晶涉性侵被捕？　王晶：大陸起碼有500個王晶

無綫下月將會播出由愛奇藝出品、王晶監製嘅網劇《冒險王衛斯理》，今日更喺將軍澳電視廣播城舉行記者會，除咗有余文樂、胡然、林家棟同任達華等主要演員撐場，會上仲播放咗劇集嘅精彩片段，當中就有唔少電腦特技畫面，喺電視劇嚟講真係幾唔錯。

都真係幾勁，除咗去咗埃及拍實景，仲有一個望落幾犀利嘅CG牛頭人：

王晶接受《香港01》訪問時就話拍呢套劇係自己嘅童年夢想：「十歲時衛斯理系列喺報紙連載時已經日日追，印象好深，雖然入咗影圈都有拍過呢個系列嘅戲，但係因為資金、特技水平問題，我唔係好滿意個效果，所以依家先再拍返。」提到之前都有唔少以衛斯理為題材嘅影視作品，王晶就話唔會怕比較：「唔容易比下去啦，仲有好多好嘢都未騷出嚟。」

提到內地男星高雲翔喺澳洲因涉嫌性侵一名女子而被捕，有消息就話一個名叫王晶（音譯Wang Jing）嘅製片亦一同被捕，62歲王晶就話睇咗有關報道：「嗰個人35歲咋，同埋王晶係我筆名嚟（原名王日祥）。（覺得畀人拖落水？）大陸起碼都有500個王晶啦，我自己都識五、六個，多數仲係女仔嚟。（女仔叫王晶？）我諗係佢哋傻啫！」