蔣雅文定居台灣重生活多於賺錢：台灣買樓唔似香港咁遙不可及

蔣雅文 (Mandy) 與妹妹蔣雅詩孖住出席品牌活動，兩人年紀雖然相差8年半，不過完全沒有代溝。Mandy說：「相差咁多年反而有優點，我就好似佢半個媽咪，又係家姐同朋友，佢咩都搵我，我哋關係好close。」她自言從沒有欺負過妹妹：「我大過佢咁多，蝦佢好無品，無理由同佢計較㗎嘛，由細到大我都好錫住佢好遷就佢，有份幫佢換尿片，算係我半隻手湊大，依家就見證住佢長大。」

兩姊妹咁好感情，但Mandy多年前已移居台灣，豈非會好掛住在香港生活的妹妹？Mandy說：「佢成日都會去台灣探我，我都會返香港探佢，兩地嘅距離已經唔係問題，依家又有咁多廉航。」講到台灣的生活，Mandy早前在訪問中提及香港和台灣生活大不同，她有感很多生活在香港的人都不太開心，對此她說：「其實我覺得係視乎你點取捨嘅，每個地方都有優缺點，我都有一啲台灣朋友好鍾意香港。我自己節奏比較慢，由細就喺上水粉嶺生活，到18歲先出港島，當時都適應唔到，要追住個步伐。」

Mandy坦言自己的生活並非向錢看，而是着重生活感：「我鍾意慢生活，想舒服啲，而唔係考慮賺錢同前景呢啲，事業心唔係咁重，我在乎生活感。如果事業心重嘅人會想喺香港生活，多啲機會同發展，我自己就介乎台灣同香港生活之間，取得平衡。」對於她認為賺台幣在香港使每日都似在身上割肉咁，Mandy表示：「喺台灣賺台幣嚟香港生活，可能兩日已經燒完，好彩我返嚟可以住喺妹妹同佢男朋友屋企，我好厚面皮做佢哋電燈膽，住宿有妹妹sponsor就慳返好多。我雖然低薪，但我重生活感，所以台灣好適合我。」

Mandy又指其實以打工仔收入同樓價比例去計，在台北買樓仲貴過香港，但如果不是住台北，而是住較偏遠地區往南部走，樓價就會便宜好多，就算租樓也只是港幣千幾蚊就租到一間屋。她說：「現今喺香港買樓真係好難，但喺台灣買樓唔係遙不可及嘅事，喺台灣買樓亦係我嘅目標，第時可以退休生活。」