日本樂壇天后安室奈美惠之前宣布因為覺得做歌手唔係終身職業，而將於今年9月引退，啱啱喺香港舉行完兩場演唱會嘅佢現時都忙於告別巡迴演唱會。而今日時裝品牌H&M就宣布會同安室合作，聯手打造全新女裝系列，透過佢喺亞洲嘅影響力去宣傳多元化同女權嘅精神。至於設計方面，服飾就會著重安室帶畀人嘅感覺，以天藍色為去連串所有單品，同時加入春夏最興嘅條紋同花紋圖騰等元素，最快4月25日於日本、香港、台灣、澳門開售。

為咗今次嘅合作，日本H&M總裁Lucas Seyfert仲特別寫咗封公開信簡介合作內容，更認為安室奈美惠身兼職業女性同音樂工作者對社會上立足嘅女性係一個好榜樣，完美詮釋到女性獨立自主嘅形象。