近年有好多歌唱比賽節目，搵素人參加挑選明日之星又有，搵專業歌手對決嘅亦有，不過俾到最大驚喜觀眾嘅，應該係一D本身唔係歌手嘅人忽然唱歌，歌喉仲要唔差喎。內地節目《跨界歌王》由16年開始播出，劉濤、謝娜、王祖藍等先後為觀眾帶來驚喜。

呢日第3季記者會驚覺劉愷威嘅出現，自從返內地發展後，劉愷威一直向戲劇方面發展，可能好多人都唔知道其實佢都有出過碟架﹗1997年推出國語大碟《LaLaLa 我愛你》，1998年再推一隻廣東碟《A BOY'S STORY》，計起上嚟佢同霆鋒係同期出道，當年兩位星二代都引嚟唔少比較，不過自此劉愷威就無再出碟，只係有時候唱下劇集歌曲就算啦。

記者會上有媒體問到，每季嘅決賽階段都會有歌手幫唱環節，到時劉愷威會諗住搵邊位幫手呢，佢好謙虛咁話自己覺得應該未必去到最後階段。「那如果到了那個環節，會請楊冪老師來幫忙嗎？」咦，夫妻同台合唱有噱頭噃，點知劉愷威就覆咗一句：「幫幫唱不應該是來幫忙的嗎？」睇嚟佢對老婆唱功不敢苟同，唔怕返屋企被扭耳仔咩？其實劉生劉太早喺2012年已經有首合唱歌《錯怪》，同台合唱都係理所當然嘅事呀。