胡定欣罕有地講情史　究竟同陳展鵬係咩關係？

現年36歲嘅胡定欣一直都好少會講到自己嘅戀情，咁耐以嚟定欣都只係公開承認同吳浩康及馬國明嘅戀情。而定欣日前接受電台訪問時，就大方談及自己嘅情史，當被主持問到同螢幕情侶陳展鵬嘅關係，定欣就直言係一個好拍檔：「最近兩次嘅合作都感受到觀眾好鍾意我哋兩個，我好欣賞佢，佢係好鍾意做戲，所以喺拍劇過程中，分享咗好多關於演戲同工作上嘅經歷。」提到舊愛馬國明，她笑住承認同馬國明有拍過拖，但係已經係好耐之前嘅事，而兩人依家都保持住好朋友嘅關係，坦言：「最後都唔可以一齊就證明我們係唔適合，有時候都要分清楚鍾意同適合，鍾意唔等於一定要喺埋一齊。」

另外，定欣亦透露一向唔會過問自己感情事嘅媽咪近年都有提到定欣要喺事業同愛情取得平衡，不過定欣自己就覺得喺愛情上面timing好緊要，謂：「緣份未到就真係未出現，急都急唔嚟。其實媽咪都係擔心我，係時候搵個適合自己嘅人去建立自己嘅家庭，有個人去照顧我。但的而且確依幾年係越嚟越忙，亦都未有咁樣嘅緣份出現。」談到擇偶條件，定欣就話自己對有才華同心地好嘅男仔加分。