【名校鬼故】某知名女校泳池前身係亂葬崗 麥明詩:非常猛鬼!

撰文:關穎賢
出版:更新:
傳聞某知名女校泳池前身係亂葬崗 (視覺中國)

講起香港猛鬼嘅學校,大家好自然就會諗起元朗嘅達德學校,但其實仲有好多學校都流傳唔少鬼故,原來某傳統名女校都幾猛鬼,不過呢啲都係未重建嘅時候發生。該校由建校至今已經有150幾年歷史,喺香港咁耐歷史,當然經過二次世界大戰,喺日軍佔領香港嘅時候,被佔用為憲兵總部。

相傳被日軍佔用校園嘅時候,游泳池同埋小學部花園嘅位置都係刑場同埋亂葬崗。有該校嘅舊生就透露小學部花園好猛鬼,經常都會有同學仔玩搖搖板嘅時候受傷,而搖搖板隔離就有一形狀奇怪嘅棵樹。到夜晚黑向住嗰棵樹嘅樹根講「Cleopatra」,樹根會纏住你,因為有個女仔被埋喺下面。雖然聽落就好似Harry Potter啲情節咁,唔算恐怖,但係到夜晚自己一條友都唔會夠膽試…

另外,亦聽聞游泳池嘅池底形狀好怪,泳池通常都係由淺到深慢慢斜落去,但係呢個泳池淺水嘅位置水只係去到腰間,然後就突然直插幾米深,深淺差距好大。據知就係因為泳池較淺嘅位置因為再掘落去就會掘到骸骨。問到曾就讀女校嘅麥明詩有冇聽過泳池猛鬼,佢就表示聽過某女校喺抗日時期被用作做亂葬崗,特別係泳池最猛鬼,謂:「夏天上體育堂都會游水,有聽過有人被鬼猛腳,然後扯落水底,所以一唔小心會好易浸親,好多同學都唔敢游去深水嗰邊。」相信大家都聽過鬼節唔好游水嘅講法,而人氣少同陰氣重嘅地方就更加容易遇到水鬼,加上前身係亂葬崗,怨氣就相對地重。講到呢度,就不其然諗起由洪金寶執導,元華、午馬、張堅庭等主演嘅80年代經典恐怖片《鬼猛腳》,劇情就係一對通姦男女被浸豬籠之後做咗水鬼,然後發生一連串命案,而所有屍體腳上都有手指爪痕,諗諗吓都係唔好游水好啲...