五月天嘅香港演唱會今晚就正式開始，大批「五迷」都好踴躍入迪士尼度睇騷，不過人多就自然多咗機會造成混亂，所以警方都好貼心喺自己嘅facebook專頁度出Post提醒市民要注意交通安排，仲有條片添！

喺片裡面，就有個叫「阿安」嘅大隻仔向大家呼籲：「『五月天』氣熱喇，『突然好想你』哋知道，警方『溫柔』提示市民，喺嚟緊5月4號至13號，有關於港鐵迪士尼站附近所舉行演唱會嘅特別交通安排，演唱會場地係不設私家車泊車位，所以市芯請盡量搭公共交通工具，或者使用大會特設嘅巴士路線。最後，無論係早來的我們，定係『後來的我們』，記得出發前先瀏覽以下嘅網址。」食咗五月天個名之餘仲食咗幾首歌嘅名，真係幾過癮。

或者你會覺得呢個叫「阿安」嘅大隻仔好似熟口熟面咁，好似喺唔知邊度見過，又好似邊個明星咁，因為真名叫張繼安嘅「阿安」，其實係張繼聰嘅親細佬。張繼安加入咗警隊已經好多年，之前就先後駐守上水分區同機場特警組，近年就自薦去咗公共關係科度做，專門負責社交媒體，好多同佢合作過嘅同事都覺得佢好有演戲細胞，而佢之前扮宅男又真係幾似模似樣。

其實張繼安唔止睇得，仲好打得。喺上水分區駐守嘅時候，佢就代表香港警察中國武術會散打代表隊去匈牙利布達佩斯，參加「第四屆國際警察搏擊大賽」，仲晉身男子76公斤級別決賽度拎得亞軍。